اسلام آباد:
عيد الاضحيٰ جي گذرڻ سان ئي سادگيءَ واري مهم ٻيهر شروع ڪئي وئي، جنهن تحت وفاقي راڄڌاني اسلام آباد ۾ مارڪيٽون ۽ شاپنگ مالز رات 8 وڳي بند ڪيا ويندا.
اسلام آباد جي ضلعي انتظاميا ڪاروباري ڪلاڪن جي حوالي سان نئون نوٽيفڪيشن جاري ڪري ڇڏيو آهي، جنهن موجب اسلام آباد ۾ نيون پابنديون پهرين جون 2026 کان لاڳو ٿينديون، جڏهن ته فارميسي، اسپتالن، ميڊيڪل ليبارٽريز ۽ ميڊيڪل اسٽورن کي پابندي کان استثنيٰ ڏني وئي آهي.
نوٽيفڪيشن موجب پيٽرول پمپ ۽ سي اين جي اسٽيشنون معمول موجب کليل رهنديون. نئين ٽائيم پابندي کير ۽ کير جي دڪانن تي لاڳو نه ٿيندي. راندين جون سهولتون بشمول جم ۽ پيڊل ڪورٽ پڻ استثنيٰ آهن.
اهڙي طرح آئي ٽي ڪمپنيون ۽ ڪال سينٽر به معمول موجب ڪم جاري رکي سگهندا. ريسٽورنٽ، کاڌي جا دڪان ۽ تندور رات 10 وڳي بند ٿي ويندا. گراسري، سبزي، فروٽ ۽ بيڪري جا دڪان بند ڪرڻ جو وقت به رات 10 وڳي مقرر ڪيو ويو آهي.
نوٽيفڪيشن موجب ٽيڪ اوور ۽ هوم ڊليوري سروس تي ڪا به پابندي نه هوندي. شادي هال ۽ مارڪون رات 10 وڳي بند ڪرڻ جو حڪم ڏنو ويو آهي جڏهن ته رات 10 وڳي پابندي پرائيويٽ جڳهن تي ٿيندڙ تقريبن تي به لاڳو هوندي.
ياد رهي ته توانائي جي بچت جي قدمن تحت ڪاروباري سرگرمين جا ڪلاڪ محدود ڪيا ويا آهن. ضلعي مئجسٽريٽ اسلام آباد جو اهو نوٽيفڪيشن ايندڙ حڪمن تائين لاڳو رهندو.
