اسرائيل غزه ۾ جنگ ٻيهر شروع ڪرڻ جي ڌمڪي ڏني آهي ۽ فلسطيني مزاحمتي گروپن کان هٿيار ڦٽا ڪرڻ جو مطالبو ڪيو آهي، جڏهن ته ٻئي طرف فلسطيني گروپن ان شرط کي رد ڪندي ان کي سياسي دٻاءُ قرار ڏنو آهي.
رپورٽن مطابق جيتوڻيڪ گذريل سال آڪٽوبر کان جنگبندي لاڳو ٿي چڪي آهي پر زميني صورتحال اڃا به ڇڪتاڻ واري آهي. غزه جي مختلف علائقن خاص ڪري خان يونس ۽ ديرالبلاح ۾ حملن، ڊرون جهازن ۽ ڌماڪن جا آواز وقفي وقفي سان ٻڌا پيا وڃن. طبي ذريعن موجب جنگبندي کانپوءِ 800 کان وڌيڪ فلسطيني شهيد ٿي چڪا آهن.
اسرائيلي وزير اعظم بينجمن نتنياهو تازو ڏينهن ۾ سيڪيورٽي ملاقاتون منسوخ ڪري ڇڏيون آهن ۽ محدود صلاح مشورا شروع ڪيا آهن، جڏهن ته فوجي اهلڪارن جو چوڻ آهي ته حماس هٿيار ڦٽا نه ڪرڻ جي صورت ۾ ويڙهه جي بحالي تقريبن يقيني آهي.
هڪ نئين آمريڪي پٺڀرائي واري منصوبي تحت، انساني امداد، بحالي ۽ غزه ۾ سرحد پار کولڻ جي مبينا طور تي حماس جي تدريجي تخفيف سان ڳنڍيل آهن. جڏهن ته حماس سميت ٻين فلسطيني تنظيمن ان تجويز کي رد ڪري ڇڏيو آهي ۽ چيو آهي ته هو مڪمل جنگ بندي ۽ فلسطيني رياست جي قيام کان سواءِ هٿيار ڦٽا نه ڪندا.
فلسطيني تجزيه نگارن موجب ان منصوبي جو مقصد مزاحمتي گروهن کي مجبور ڪرڻ آهي ته هو سياسي طور تي هٿيار ڦٽا ڪن جڏهن ته امداد کي دٻاءُ جي طور تي استعمال ڪيو وڃي.
ٻئي طرف زميني حقيقتون به تبديل ٿي رهيون آهن، اسرائيلي فوج غزه جي لڳ ڀڳ 59 سيڪڙو علائقي تي قبضو ڪري ورتو آهي، جڏهن ته لبنان ۽ ويسٽ بئنڪ مان اضافي فوجين کي منتقل ڪيو پيو وڃي.
اسرائيل جي جنگ جون ڌمڪيون سياسي دٻاءُ وڌائڻ ۽ اندروني چئلينجن تان ڌيان هٽائڻ جي حڪمت عملي به ٿي سگهي ٿي، ماهرن جو چوڻ آهي ته فوج ڪيترن ئي محاذن تي دٻاءُ کي منهن ڏئي رهي آهي.
ٻئي طرف فلسطيني عوام اڄ به سخت مشڪلاتن جو شڪار آهي. تازي انگن اکرن موجب جنگ جي شروعات کان وٺي هن وقت تائين 72 هزار کان وڌيڪ فلسطيني مارجي چڪا آهن، جڏهن ته غزه جا ماڻهو ٻي ممڪن جنگ جي خوف ۾ زندگي گذاري رهيا آهن.
