قومي ڪرڪيٽ ٽيم جو تجربيڪار فاسٽ بالر محمد عباس پاڪستان جي تاريخ جو ڪامياب ترين ٽيسٽ بالر بڻجي ويو.
ويسٽ انڊيز خلاف ٽروبا ۾ کيڏيل پهرين ٽيسٽ ميچ دوران هن اڳوڻي ڪپتان عمران خان جو ڊگهو رڪارڊ ٽوڙي ڇڏيو ۽ گهٽ ۾ گهٽ 100 ٽيسٽ وڪيٽون وٺندڙ پاڪستاني فاسٽ بالرن ۾ بهترين بالنگ ايوريج جو اعزاز حاصل ڪري ورتو.
36 ورهين جي عباس ويسٽ انڊيز جي ٻي اننگز ۾ برينڊن ڪنگ، ڪيم هوج ۽ جسٽن گريوز جون وڪيٽون ورتيون، جڏهن ته پهرين اننگز ۾ ٽي ڪيچ پڻ ورتو.
ان شاندار ڪارڪردگي کانپوءِ 30 ٽيسٽ ميچن ۾ سندس وڪيٽن جو انگ 115 ٿي ويو جڏهن ته بالنگ جي اوسط 22.78 ٿي وئي.
ان کان اڳ اڳوڻي ڪپتان عمران خان 88 ٽيسٽ ميچن ۾ 22.81 جي اوسط سان 362 وڪيٽون وٺي پهرين نمبر تي آهي جڏهن ته وقار يونس 23.56 جي اوسط سان ٽئين نمبر تي آهي.
ياد رهي ته محمد عباس 2017 ۾ ويسٽ انڊيز خلاف ٽيسٽ ڊيبيو ڪيو هو پر بعد ۾ هو ٽن سالن کان وڌيڪ عرصي تائين قومي ٽيم کان ٻاهر رهيو.
ڊسمبر 2025 ۾ ڏکڻ آفريڪا ۾ واپسي کانپوءِ، هو ٻيهر پاڪستان جي معروف فاسٽ بالرن ۾ شامل ٿيو.
هن سال هن ٽن ٽيسٽ ميچن ۾ 15 وڪيٽون ورتيون آهن، جن ۾ پنج وڪيٽ جي اننگز به شامل آهي.
عباس فرسٽ ڪلاس ڪرڪيٽ ۾ 220 ميچن ۾ 894 وڪيٽون پڻ ورتيون آهن.
