ڀارتي اداڪار ستيندرا سوني فلم جي شوٽنگ دوران پيش آيل هڪ مبينا اڻ وڻندڙ واقعي سان لاڳاپيل هڪ وڊيو جاري ڪندي فلمساز تي سنگين الزام هنيا آهن.
فلم ”لپتا ليڊيز“ ۽ ويب سيريز ”مرزاپور“ ۾ پنهنجي اداڪاري جي ڪري مشهور اداڪار ستيندرا سوني جو چوڻ آهي ته کيس ۽ ٻين فنڪارن کي نه رڳو شوٽنگ مان ڪڍيو ويو پر معاوضي جي گهر ڪرڻ تي جان کان مارڻ جون ڌمڪيون پڻ ڏنيون ويون.
انسٽاگرام تي شيئر ڪيل هڪ وڊيو ۾، ستيندرا سوني چيو ته هو هدايتڪار پشپندر سنگهه جي فلم ’پيد پالڪي‘ جي شوٽنگ لاءِ مڌيا پرديش جي شهر ميهر ويو هو.
سندس چوڻ هو ته کيس 50 هزار رپيا ايڊوانس طور ڏنا ويا جڏهن ته باقي رقم شوٽنگ دوران ادا ڪرڻ جو واعدو ڪيو ويو.
پر 8 ڏينهن جي عدم ادائيگي کانپوءِ جڏهن هنن معاوضي جو مطالبو ڪيو ته کين فوري طور هوٽل خالي ڪرڻ جو حڪم ڏنو ويو.
اداڪار وڌيڪ الزام هنيو ته ڊائريڪٽر کيس 10 منٽن اندر هوٽل مان ٻاهر نڪرڻ جي ڌمڪي ڏني ۽ جيڪڏهن ٻيهر ڏٺو ويو ته کيس قتل ڪري ڇڏينداسين، جڏهن ته فلم جي ليڊ اداڪارا ۽ پروڊيوسر جي زال پراگتي چوهان سان به بدسلوڪي ڪئي وئي.
بعد ۾، ستيندرا سوني هڪ ٻي پوسٽ ۾ چيو ته هو ۽ سندس ساٿي ماههر پوليس، اداڪار اشوتوش رانا ۽ ٻين جي مدد سان محفوظ طور تي ممبئي واپس پهچي ويا آهن.
