سنڌ هاءِ ڪورٽ جي آئيني بئنچ ۾ ملازمن کي مستقل نه ڪرڻ تي چيئرمين ڪي پي ٽي خلاف توهين عدالت جي درخواست جي ٻڌڻي ٿي. عدالت ڪي پي ٽي جي چيئرمين شاهد احمد کي شوڪاز نوٽيس جاري ڪندي 25 مئي تي ذاتي طور تي طلب ڪري ورتو.
عدالت ڪيس جي ٻڌڻي لاءِ ڪي پي ٽي جي وڪيل جي پيش نه ٿيڻ تي سخت ڪاوڙ جو اظهار ڪيو. جسٽس حسن اڪبر رمارڪس ڏنا ته ڪي پي ٽي جو وڪيل ڪٿي آهي؟ پبلڪ پراسيڪيوٽر چيو ته ڪي پي ٽي جو وڪيل عدالت ۾ پيش نه ٿيو. جسٽس حسن اڪبر رمارڪس ڏنا ته ڪي پي ٽي جا وڪيل گهڻي عرصي کان ڪنهن به ڪيس ۾ پيش نه ٿيا آهن.
درخواستگذارن جي وڪيل اسدالله بلوچ ايڊووڪيٽ موقف اختيار ڪيو ته ڪي پي ٽي ۾ ملازم 2009 کان ڪارگو مين، لفٽ آپريٽر ۽ ٻين عهدن تي ڪم ڪري رهيا آهن. درخواستگذار جي وڪيل موجب سنڌ هاءِ ڪورٽ درخواستگذارن کي 2021ع ۾ مستقل ڪرڻ جو حڪم ڏنو هو.
درخواستگذار جي وڪيل موقف اختيار ڪيو ته ڪي پي ٽي پراڻن ملازمن کي مستقل ڪرڻ بدران نئين ڀرتي جو اشتهار جاري ڪيو. هن چيو ته عدالت ڪي پي ٽي ۾ نيون ڀرتيون روڪي ڇڏيون، ان باوجود درخواستگذارن کي مستقل نه ڪيو پيو وڃي.
