پريشر ۾ رهندو هوس، هاڻي ڪرڪيٽ مان لطف اندوز آهيان، صاحبزاده فرحان

پاڪستان جي اڀرندڙ اوپنر صاحبزاده فرحان جو چوڻ آهي ته اڳي هو پرفارمنس جي حوالي سان دٻاءُ ۾ هوندو هو، هاڻي ڪرڪيٽ ۾ مزو اچي رهيو آهي جنهن جا نتيجا بهتر ٿيا آهن.

اسپورٽس ويب سائيٽ ڪرڪنفو کي ڏنل انٽرويو ۾ صاحبزاده فرحان اسٽيو سمٿ سان گڏ اوپننگ کي اعزاز قرار ڏيندي چيو ته هن کان گهڻو ڪجهه سکي رهيو آهي.

هن اعتراف ڪيو ته افتخار احمد ۽ ڪوچ عبدالرحمان جي مشوري سندس اسٽرائڪ ريٽ ۽ پاور هٽنگ کي بهتر بڻائڻ ۾ اهم ڪردار ادا ڪيو، جنهن لاءِ هو هر روز سخت مشق به ڪندو آهي.

واضح رهي ته صاحبزاده فرحان 2025 جي شروعات کان وٺي غير معمولي ڪارڪردگي ڏيکاريندي ٽي ٽوئنٽي ڪرڪيٽ ۾ سڀ کان وڌيڪ رنسون ۽ ڇڪا هڻڻ جو اعزاز حاصل ڪري ورتو آهي.

قومي ٽيم ۾ واپسي کانپوءِ هن 35.85 جي اوسط ۽ 140 کان وڌيڪ اسٽرائڪ ريٽ سان 1219 رنسون ٺاهيون، جڏهن ته ٽي 20 ورلڊ ڪپ ۾ 383 رنسون ٺاهي نئون رڪارڊ پڻ قائم ڪيو.

سندس اها ڪاميابي ڊوميسٽڪ ڪرڪيٽ ۾ شاندار ڪارڪردگيءَ کانپوءِ ممڪن ٿي، جتي هن نيشنل ٽي 20 ڪپ ۾ 605 رنسون ٺاهي سڀني کي متاثر ڪيو.