ڪراچي سميت سڄي ملڪ ۾ بجلي جي صارفين لاءِ ماهوار فيول ايڊجسٽمينٽ جي مد ۾ 27 پئسا في يونٽ واڌ جو امڪان آهي.
سينٽرل پاور پرچيزنگ ايجنسي (سي پي پي اي) مارچ جي مهيني جي فيول ايڊجسٽمينٽ جي مد ۾ بجلي جي قيمت ۾ 27 پئسا في يونٽ واڌ جي درخواست ڪئي هئي، جنهن تي نيشنل اليڪٽرڪ پاور ريگيوليٽري اٿارٽي (نيپرا) اڄ ٻڌڻي مڪمل ڪري ورتي.
نيپرا جو چوڻ آهي ته هو ڊيٽا جو جائزو وٺڻ بعد فيصلو جاري ڪندا، واڌو اليڪٽرڪ سميت سمورن صارفين تي لاڳو ٿيندو.
نيشنل اليڪٽرڪ پاور ريگيوليٽري اٿارٽي (نيپرا) ۾ ٿيندڙ ٻڌڻي دوران پاور سيڪٽر بابت اهم نقطا سامهون آيا.
اختيارين موجب قطر سان آر ايل اين جي جا معاهدا ”وڃو ۽ ادا“ جي بنياد تي ٿين ٿا، يعني گئس استعمال نه ڪرڻ جي صورت ۾ به ادائيگي ڪئي ويندي آهي. مقامي گيس جي حوالي سان ٻڌايو ويو ته 150 ايم ايم ايف سي ڊي سرپلس گيس موجود آهي جيڪا مختلف شعبن ۾ استعمال ٿي رهي آهي، جڏهن ته وڌيڪ تفصيل پيٽروليم ڊويزن ٻڌائي سگهي ٿو.
آفيسر واضح ڪيو ته بيس ٽيرف ۾ واڌ بابت خبرون بي بنياد آهن ۽ جنوري 2027 کان اڳ ڪو به فيصلو متوقع ناهي.
مارچ ۾ بجلي جي سراسري قيمت 8.26 رپيا في يونٽ جڏهن ته ريفرنس لاڳت 7.99 رپيا هئي. بجلي جي پيداوار ۾ پاڻي جو حصو 18 سيڪڙو جي لڳ ڀڳ رهيو جڏهن ته آر ايل اين جي جي پيداوار ۾ به گهٽتائي ڏسڻ ۾ آئي.
اختيارين جو چوڻ آهي ته جيڪڏهن لوڊشيڊنگ نه ڪئي وئي ته گردشي قرض 400 کان 500 ارب رپين تائين وڌي سگهي ٿو.
ان کان علاوه نيشنل گرڊ مان ڪي اليڪٽرڪ کي لڳ ڀڳ 2 هزار ميگاواٽ بجلي فراهم ڪئي پئي وڃي، جنهن سان نيشنل گرڊ کي مستحڪم ڪرڻ ۽ فيول ايڊجسٽمينٽ گهٽائڻ ۾ مدد ملي آهي.
رپورٽ موجب مارچ ۾ 8 ارب 939 ملين يونٽ بجلي پيدا ڪئي وئي جڏهن ته ڊسڪوز کي 8 ارب 64 ڪروڙ 40 لک يونٽ بجلي فراهم ڪئي وئي ۽ هلندڙ مهيني جي حوالي سان قيمت 7.99 رپيا في يونٽ مقرر ڪئي وئي.
رپورٽ ۾ چيو ويو ته بجلي جي پيداوار ۾ پاڻي جو حصو 23.55 سيڪڙو، ائٽمي فيول 21.95 سيڪڙو، مقامي ڪوئلي جو 16.76 سيڪڙو رهيو.
ان کان علاوه درآمدي ڪوئلي جو 13.80 سيڪڙو، گهريلو گئس 11.34 سيڪڙو، ايل اين جي 5.64 سيڪڙو، ونڊ 3.46 سيڪڙو، سولر 1.18 سيڪڙو ۽ فرنس آئل 1.02 سيڪڙو رهيو.
جيڪڏهن واڌ جي منظوري ڏني وئي ته اهو ڪي اليڪٽرڪ سميت سمورن صارفين تي لاڳو ٿيندو.
