تل ابيب: (م ڊ) مشهور اسرائيلي ليکڪ، صحافي ۽ ڪالم نگار گيڊون ليوي چيو آهي ته اسرائيلي وزيراعظم بينجمن نيتن ياهو هاڻي چڱي ريت ڄاڻي چڪو آهي ته هو ايران خلاف پنهنجا مقصد حاصل ڪرڻ ۾ ناڪام ٿي ويو آهي پر هو ان حقيقت کي تسليم ڪرڻ لاءِ تيار ناهي.
اسرائيلي ميڊيا کي جاري ڪيل بيان ۾ گيڊون ليوي چيو ته شڪست جو اعتراف ڪرڻ هميشه ڏکيو هوندو آهي پر زميني حقيقتن کي نظرانداز نٿو ڪري سگهجي. سندس چوڻ هو ته ايران کي ڪمزور ڪرڻ يا ان جي طاقت کي ختم ڪرڻ نيتن ياهو جي سياسي زندگيءَ جي اهم مقصدن ۾ شامل هو، پر جنگ ۽ ڇڪتاڻ جي مختلف مرحلن جي باوجود اسرائيل پنهنجا بنيادي مقصد حاصل نه ڪري سگهيو.
هن چيو ته ايران خلاف جاري ڪاررواين ۽ ڇڪتاڻ باوجود اسرائيل اڃا تائين ڪو واضح نتيجو حاصل نه ڪري سگهيو آهي جنهن کي مڪمل ڪاميابي چئي سگهجي. هنن چيو ته نتنياهو چڱي ريت ڄاڻي ٿو ته سندس ڊگهي مدي واري حڪمت عملي گهربل نتيجا نه ڏني آهي.
گيڊون ليوي وڌيڪ چيو ته اسرائيل جا ڪجهه سياسي ۽ حڪومتي حلقا آمريڪا کي نظرانداز ڪري ايران خلاف سخت فوجي ڪارروائي جي حمايت ڪري رهيا آهن پر اها ذهنيت خطي کي وڌيڪ غير مستحڪم ڪري سگهي ٿي.
اسرائيلي ليکڪ موجب جيڪڏهن مستقبل ۾ ايران خلاف وڌيڪ حملا ٿيا ته ان ڳالهه جي ڪا به ضمانت ناهي ته اسرائيل پنهنجا مقصد حاصل ڪري وٺندو يا ايران کي مڪمل شڪست ڏيندو.
سياسي مبصرن موجب گيڊون ليوي جو بيان اهڙي وقت سامهون آيو آهي جڏهن وچ اوڀر ۾ ايران ۽ اسرائيل وچ ۾ ڇڪتاڻ عالمي ڌيان جو مرڪز بڻيل آهي ۽ ٻنهي ملڪن وچ ۾ وڌندڙ ڇڪتاڻ تي سڄي دنيا ۾ خدشا آهن.
