وائيٽ هائوس جي نائب ترجمان اينا ڪيلي چيو آهي ته جيڪڏهن ايران نيڪ نيتي سان ڳالهيون نه ڪيون ته آمريڪي صدر ٽرمپ قومي سلامتي بابت ضروري فيصلا ڪندو.
پنهنجي بيان ۾ اينا ڪيلي چيو ته صدر ٽرمپ ڪيترائي ڀيرا واضح ڪري چڪو آهي ته ايران کي ڪنهن به حالت ۾ ايٽمي هٿيار حاصل ڪرڻ جي اجازت نٿي ڏئي سگهجي.
هن چيو ته ايران هن وقت فوجي ۽ معاشي دٻاءُ کي منهن ڏئي رهيو آهي ۽ عالمي سطح تي وڌيڪ اڪيلو ٿي ويو آهي. هن چيو ته آمريڪا وٽ ايران سان ڊيل جا سمورا آپشن موجود آهن.
وائيٽ هائوس جي نائب ترجمان موجب صدر ٽرمپ پنهنجي ريڊ لائين واضح ڪري ڇڏي آهي، جنهن ۾ سڀ کان اهم شرط اهو آهي ته ايران ايٽمي هٿيار حاصل نه ڪري.
هن خبردار ڪيو ته جيڪڏهن تهران اهي شرط قبول نه ڪيا ته آمريڪا سخت قدم کڻي سگهي ٿو.
اينا ڪيلي چيو ته واشنگٽن اڃا به سفارتي حل کي ترجيح ڏئي ٿو، پر جيڪڏهن ايران ڳالهين ۾ سنجيدگي نه ڏيکاري ته آمريڪي قيادت صورتحال موجب فيصلو ڪندي.
اهو بيان هڪ اهڙي وقت سامهون آيو آهي جڏهن ايران ۽ آمريڪا وچ ۾ ڇڪتاڻ هڪ ڀيرو ٻيهر وڌي رهي آهي ۽ خطي ۾ ممڪن فوجي ڪاررواين جون قياس آرائيون جاري آهن.
