آبنائے هرمز جي بندش کانپوءِ عالمي واپاري رستن ۾ وڏيون تبديليون اچي رهيون آهن ۽ سامونڊي رستن بدران زميني رستن جو استعمال وڌي رهيو آهي.
نيوز ايجنسي اي ايف پي موجب جهازن جي روانگي کانپوءِ تجارتي سامان جي ترسيل لاءِ متبادل رستا اختيار ڪيا پيا وڃن.
رپورٽ موجب سامونڊي رستن جي بندش سبب شپنگ ڪمپنيون هاڻي کاڌ خوراڪ ۽ تيار ڪيل سامان ٽرڪن ذريعي نار جي ملڪن ڏانهن پهچائي رهيون آهن. ان سلسلي ۾، سعودي عرب جي جده بندرگاهه هڪ نئين علائقائي مرڪز طور اڀري رهيو آهي، جتي وڏين عالمي شپنگ ڪمپنيون جهڙوڪ.
جهاز سويز ڪينال ذريعي جده پهچن ٿا، جتان سامان ريگستاني هاءِ ويز ذريعي شارجه، بحرين ۽ ڪويت جهڙن ملڪن ڏانهن پهچايو وڃي ٿو، ڇاڪاڻ ته انهن علائقن تائين سامونڊي رسد گذريل ٻن مهينن کان بند آهي.
ماهرن موجب جده بندرگاهه ايتري وڏي مقدار ۾ واپار کي هٿي وٺرائڻ لاءِ مڪمل طور تي تيار ناهي، جنهن سبب آمد و رفت ۽ دير جو مسئلو پيدا ٿي رهيو آهي.
رپورٽ ۾ شامل ڪيو ويو آهي ته شپنگ ڪمپنيون هرمز جي ٻاهران ٻين بندرگاهن کي پڻ استعمال ڪري رهيون آهن، جن ۾ عمان ۾ سهر پورٽ، گڏيل عرب امارات ۾ خور فڪن بندرگاهه ۽ فجيره بندرگاهه شامل آهن.
ان کان علاوه اردن جو عقبه بندرگاهه عراق جي شهرن بغداد ۽ بصره تائين سامان پهچائڻ جو اهم مرڪز بڻجي ويو آهي، جڏهن ته ترڪي جي ذريعي اتر عراق ڏانهن به سامان موڪليو پيو وڃي.
ماهرن جو چوڻ آهي ته آبنائي هرمز جي بندش عالمي واپار کي سخت متاثر ڪيو آهي ۽ نئين سپلائي چينز جو قيام ناگزير ٿي ويو آهي.
