وزيراعظم پنهنجي سيني تي پٿر رکي پيٽرول جي اگهن ۾ واڌ جو ڊرامو بند ڪري: حافظ نعيم

امير جماعت اسلامي حافظ نعيم الرحمان چيو آهي ته حڪومت پيٽروليم ليوي ختم نه ڪئي ته سڄي ملڪ ۾ شٽر ڊائون، ڦيٿا جام، روڊ بلاڪ ڪيا ويندا، حڪمران عوام جو رت وهائڻ بند ڪن. 18 مئي تي پيٽروليم ليوي کي آئيني عدالت ۾ چئلينج ڪنداسين. اهڙن خيالن جو اظهار هن اسلام آباد جي ابپارا چوڪ تي پيٽروليم شين جي اگهن ۾ واڌ خلاف احتجاجي مظاهري کي خطاب ڪندي ڪيو. حافظ نعيم الرحمان چيو ته مهانگائي خلاف تحريڪ اسلام آباد کان شروع ٿي چڪي آهي، ڇنڇر تي چترال ۽ ٻئي ڏينهن ديرپائي ۾ تاريخي جلسا ٿيندا، ملڪ گير هڙتال ۽ ڦيٿا جام بابت مشاورت کانپوءِ لائحه عمل جو اعلان ڪيو ويندو، عيد کانپوءِ احتجاجي تحريڪ زور وٺندي. هن چيو ته وزيراعظم شهباز شريف پيٽروليم ليوي مان هن وقت تائين 8 هزار 66 ارب رپيا گڏ ڪيا، جنهن مان 100 ارب به پيٽروليم انفراسٽرڪچر جي بهتري تي نه لڳايا ويا. حافظ نعيم چيو ته ڪجهه وزيرن پيٽروليم شين جي اگهن ۾ وڌيڪ واڌ جو اشارو ڏنو آهي، حڪمران ائين ڪرڻ کان پاسو ڪن ته جيئن عوام جي ڪاوڙ کين حسينه واجد وانگر ڀڄڻ جو موقعو نه ڏئي.



Source link