آمريڪي صدر ٽرمپ هڪ ڀيرو ٻيهر ايران خلاف فوجي ڪارروائي جي ڌمڪي ڏيندي چيو آهي ته تهران وٽ معاهدي تي پهچڻ ۾ صرف ٻه ٽي ڏينهن آهن.
آمريڪي صدر چيو ته هو ايران تي حملي جو حڪم ڏيڻ کان صرف هڪ ڪلاڪ پري هو، پر بعد ۾ ڳالهين کي هڪ ٻيو موقعو ڏيڻ لاءِ ان ڪارروائي ۾ دير ڪئي.
ٽرمپ چيو ته آمريڪا ايران کي ايٽمي هٿيار حاصل ڪرڻ نه ڏيندو ۽ جيڪڏهن ڳالهيون ناڪام ٿيون ته واشنگٽن سخت فيصلا ڪري سگهي ٿو.
ٻئي طرف جي ڊي وينس چيو آهي ته ايران ۽ آمريڪا وچ ۾ ڳالهين ۾ ڪافي اڳڀرائي ٿي آهي ۽ ٻئي ملڪ ٻيهر جنگ يا فوجي مهم شروع ڪرڻ نٿا چاهين.
آمريڪي نائب صدر موجب سفارتي ڪوششون جاري آهن ۽ ٻئي طرف ڇڪتاڻ گهٽائڻ لاءِ ڪو حل ڳولڻ جي ڪوشش ڪئي پئي وڃي.
ٻئي طرف عباس عراقچي خبردار ڪيو آهي ته ايران گذريل جنگي صورتحال مان اهم فوجي تجربو ۽ ڄاڻ حاصل ڪئي آهي.
ايراني پرڏيهي وزير چيو ته جيڪڏهن ٻيهر جنگ مسلط ڪئي وئي ته دنيا ڪيتريون ئي نيون ۽ حيران ڪندڙ صورتحال ڏسندي. هن چيو ته ايران هاڻي اڳي کان وڌيڪ تيار آهي ۽ ڪنهن به ممڪن فوجي ڪارروائي جو ڀرپور جواب ڏئي سگهي ٿو.
آمريڪا ۽ ايران وچ ۾ تازي ڇڪتاڻ سبب وچ اوڀر جي صورتحال هڪ ڀيرو ٻيهر غير يقيني واري صورتحال اختيار ڪري وئي آهي، جڏهن ته عالمي برادري ٻنهي ملڪن تي ڳالهيون جاري رکڻ تي زور ڏئي رهي آهي.
