واشنگٽن: آمريڪي صدر ڊونلڊ ٽرمپ ايران خلاف مڪمل فوجي ڪارروائي ٻيهر شروع ڪرڻ جي امڪان تي غور ڪيو آهي، پر هن وقت تائين سفارتي ڳالهين جو عمل جاري رکڻ جو فيصلو ڪيو آهي.
وال اسٽريٽ جرنل جي رپورٽ موجب صدر ٽرمپ گذريل ڪجهه ڏينهن ۾ پنهنجي صلاحڪارن سان ملاقاتن دوران ايران خلاف وڌيڪ هوائي حملن جي امڪان تي به ڳالهه ٻولهه ڪئي آهي.
رپورٽ ۾ چيو ويو آهي ته آمريڪي انتظاميا خطي ۾ بدلجندڙ صورتحال جي تناظر ۾ مستقبل جي حڪمت عملي جو تعين ڪرڻ لاءِ مختلف فوجي ۽ سفارتي آپشنز جو جائزو ورتو آهي.
رپورٽ موجب جيتوڻيڪ ايران خلاف وڌيڪ فوجي ڪارروائي جي امڪان تي غور ڪيو ويو پر موجوده مرحلي ۾ آمريڪي صدر سفارتي عمل کي جاري رکڻ ۽ ڳالهين ذريعي پيش رفت جي ڪوششن کي اوليت ڏني آهي.
اها پيش رفت هڪ اهڙي وقت ۾ سامهون آئي آهي جڏهن آمريڪا ۽ ايران وچ ۾ مفاهمت جي ياداشت کانپوءِ ٽيڪنيڪل سطح تي رابطا ۽ سفارتي ڪوششون جاري آهن جڏهن ته خطي ۾ تازي ڇڪتاڻ باوجود ٻئي ملڪ مختلف چينلز ذريعي رابطو جاري آهن.
تجزيه نگارن جو چوڻ آهي ته آمريڪي انتظاميا طرفان سفارتي رستو اختيار ڪرڻ جي فيصلي کي وچ اوڀر ۾ وڌيڪ ڇڪتاڻ کان بچڻ جي ڪوشش طور ڏٺو پيو وڃي. بهرحال مستقبل جي صورتحال جو دارومدار ڳالهين ۾ اڳڀرائي ۽ ٻنهي ملڪن جي رويي تي هوندو.
هينئر تائين، وال اسٽريٽ جرنل جي هن رپورٽ تي وائيٽ هائوس طرفان ڪوبه سرڪاري ردعمل نه آيو آهي.
