پشاور ۾ اڳوڻي وڏي وزير علي امين گنڊاپور پارلياماني گروپ جي اجلاس دوران پنهنجي ئي حڪومت جي پاليسين تي تنقيد ڪئي ۽ اسيمبلي ميمبرن جي مراعات ۾ واڌ واري قانون تي ڪاوڙ جو اظهار ڪيو.
هن چيو ته ڏينهون ڏينهن اهڙا قدم کنيا پيا وڃن، جنهن سبب حڪومت تنقيد جو نشانو بڻجي رهي آهي. هنن چيو ته سندن ئي وزير ۽ اسيمبلي ميمبر پنهنجي تڪن ۾ غير معياري ترقياتي ڪمن جون شڪايتون ڪري رهيا آهن، هر طرف ناقص ڪم جون شڪايتون آهن، اسيمبلي ميمبر ڪم روڪي رهيا آهن، ڀرتين ۽ بدلين تي ثبوتن سان اعتراض اچي رهيا آهن ۽ حڪومت تي خراب حڪمراني تي تنقيد ڪئي پئي وڃي.
علي امين گنڊاپور چيو ته ادائگيون نه ٿيون ٿين جتي ٿيڻ گهرجن، جڏهن ته ايڊوانس ادائگيون ڪيون پيون وڃن جتي ڪم نه ٿيو آهي.
هن سوال اٿاريو ته حڪومت ۾ اهڙا آرڊر ڪير جاري ڪري رهيا آهن ۽ ڪنهن جي خواهش تي منظور ٿيل قانون پاس ڪيا پيا وڃن.
علي امين گنڊاپور چيو ته بجيٽ اجلاس ۾ خبر پئي ته وزيرن ۽ اسيمبلي ميمبرن جي پگهارن ۾ واڌ ڪئي وئي آهي، هن اڳ چيو هو ته ائين نه ڪيو وڃي ڇو ته ان سان عوام کي تنقيد جو نشانو بڻايو ويندو.
هن چيو ته پگھارون گهٽ هجڻ باوجود باني چيئرمين پگهارون وڌائڻ کان منع ڪئي هئي ان ڪري هو ان جو حصو نه بڻجندا.
هن چيو ته عوام جي غربت ۽ بيروزگاري کي ڏسندي اهڙن فيصلن کان پاسو ڪيو وڃي، جيڪڏهن ڪو پنهنجي پگهار وڌائڻ چاهي ٿو ته ان جو نالو سامهون آندو وڃي.
هن وڌيڪ چيو ته هو پنهنجي پارٽي اڳواڻ جي ويزن تي سمجهوتو نٿو ڪري سگهي.
اڳوڻي وڏي وزير چيو ته صوبي ۾ آپريشن ٿي رهيا آهن ۽ وڌيڪ به ٿيندا، آپريشن صوبائي حڪومت جي فنڊن سان ٿي رهيا آهن، جڏهن ته عوام حڪومت کان اميد رکي ٿو ته جان، مال ۽ عزت جو تحفظ ڪيو ويندو.
