اسلام آباد:
حج ادا ڪرڻ کانپوءِ پاڪستاني حاجين جي واپسي باقاعدي شروع ٿي وئي. حج کانپوءِ پهرين اڏام جده کان 114 حاجين کي کڻي وفاقي راڄڌاني اسلام آباد پهتي.
اسلام آباد انٽرنيشنل ايئرپورٽ تي زائرين جو شاندار استقبال ڪيو ويو. ان موقعي تي چيف آپريٽنگ آفيسر آفتاب گيلاني ايئرپورٽ سيڪيورٽي فورس ۽ قومي ايئر لائن جا اعليٰ عملدار پڻ موجود هئا، جن حاجين جو استقبال ڪيو.
قومي ايئر لائن موجب پوسٽ حج فلائيٽ آپريشن تحت مختلف شهرن لاءِ خصوصي پروازن جو سلسلو جاري رهندو.
لاهور لاءِ ٻي حج اڏام جده کان رواني ٿيندي جڏهن ته ڪراچي کان حاجين کي کڻي پهرين خصوصي اڏام اڄ شام پنهنجي مقرر وقت تي پهچندي.
پي آءِ اي ترجمان جو چوڻ آهي ته پوسٽ حج آپريشن 30 جون تائين جاري رهندو، جنهن دوران جده ۽ مديني کان ملڪ جي مختلف شهرن اسلام آباد، ڪراچي، لاهور، فيصل آباد، ملتان، سيالڪوٽ ۽ ڪوئيٽا لاءِ پروازون هلايون وينديون.
اختيارين موجب 53 هزار کان وڌيڪ پاڪستاني حاجين کي 213 اسپيشل اڏامن ذريعي وطن واپس آندو ويندو.
قومي ايئر لائن زائرين کي بهتر سفري سهولتون فراهم ڪرڻ لاءِ سمورا انتظام مڪمل ڪري ورتا آهن، جڏهن ته سموري آپريشن جي اعليٰ سطح تي نگراني ڪئي پئي وڃي.
حاجين جي واپسي تي سڄي ملڪ جي ايئرپورٽس تي خوشي ۽ جذبي جا لمحا نظر اچن ٿا، جتي خاندان پنهنجن پيارن جي استقبال لاءِ بيتاب نظر اچي رهيا آهن.
