پاڪستاني ۽ چيني ڪمپنين وچ ۾ فارما سيڪٽر ۾ 440 ملين ڊالرن جا 9 معاهدا ٿيا

پاڪستان ۽ چين جي نجي شعبي دواسازي سان لاڳاپيل شعبن ۾ 440 ملين ڊالر کان وڌيڪ جي 9 معاهدن تي صحيحون ڪيون آهن، جن ۾ مقامي ويڪسين جي ترقي، بايو ٽيڪنالاجي، دوائن جي پيداوار، ٽيڪنالاجي جي مٽاسٽا ۽ هيپاٽائيٽس جي روڪٿام بابت معاهدا شامل آهن.

اهي معاهدا اسلام آباد جي مقامي هوٽل ۾ منعقد پاڪستان ۽ چين جي دوا ساز ڪمپنين جي بزنس ٽو بزنس ڪانفرنس ۾ ڪيا ويا، جنهن ۾ وزيراعظم سميت اعليٰ عملدارن شرڪت ڪئي. ان موقعي تي وفاقي وزيرن، خصوصي معاونن ۽ اعليٰ سرڪاري عملدارن کان علاوه پاڪستان ۾ مقرر چيني سفير ۽ مقامي ۽ چيني دوا ساز ڪمپنين جا نمائندا وڏي انگ ۾ موجود هئا.

ڪانفرنس ۾ پاڪستان ۽ چين جي 450 کان وڌيڪ ڪمپنين شرڪت ڪئي، جن ۾ 300 کان وڌيڪ پاڪستاني ۽ 150 چيني ڪمپنيون شامل هيون.

وزيراعظم شهباز شريف معاهدن جي آجيان ڪندي چيو ته ٻنهي ملڪن جي پرائيويٽ ڪمپنين وچ ۾ سهڪار سان پاڪستان ۾ دوائن جي شعبي کي ترقي ملندي، چين پاڪستان جو قابل اعتماد ۽ تجربيڪار دوست آهي ۽ ان جي اقتصادي ۽ اسٽريٽجڪ ترقي دنيا لاءِ مثال آهي، چيني شهرين جي سلامتي تي ڪنهن به وقت سمجهوتو نه ڪيو ويندو.

وزيراعظم ڪانفرنس جي انعقاد ۽ ان ۾ چيني ۽ پاڪستاني سيڙپڪارن جي شرڪت جي آجيان ڪئي. هن ٻنهي ملڪن جي واپاري برادري کان علاوه صحت واري وفاقي وزير، صنعت ۽ پيداوار بابت خصوصي معاون، پاڪستان ۾ چين جي سفير ۽ چين ۾ پاڪستان جي سفير جي ڪوششن کي به ساراهيو.

وزيراعظم ان اميد جو اظهار ڪيو ته انهن معاهدن تي عمل ڪيو ويندو. هن چين کي پاڪستان جو قابل اعتماد ۽ تجربيڪار دوست قرار ڏيندي چيو ته چين هر ڏکئي وقت ۾ پاڪستان جو ساٿ ڏنو آهي ۽ پاڪستان جي معاشي ترقي ۾ اهم ڪردار ادا ڪيو آهي.

وزيراعظم چيني قيادت جي غير متزلزل حمايت تي شڪريو ادا ڪندي چيو ته چيني صدر شي جن پنگ هڪ ويزنري اڳواڻ آهي جنهن چيني سماج ۽ معيشت کي مڪمل طور تبديل ڪري ڇڏيو آهي.

چين جي ترقي کي بي مثال قرار ڏيندي هن چيو ته چين نه رڳو اقتصادي ترقي جي ميدان ۾ پر اسٽريٽجڪ ترقي جي ميدان ۾ به پنهنجي طاقت جو ثبوت ڏنو آهي. وزيراعظم تعليم، تحقيق ۽ ترقي سميت هر شعبي ۾ چيني عوام جي بي مثال محنت ۽ ڪارڪردگي کي ساراهيو.

وزيراعظم چيو ته اڄ دواسازي جي ترقي ۽ سيڙپڪاري جو بهترين موقعو آهي، ٻنهي ملڪن جي سيڙپڪارن وچ ۾ پيداوار، ويڪسين جي پيداوار ۽ تحقيق ۽ ترقي جي شعبن ۾ سهڪار سان دواسازي جي سمورن شعبن ۾ ترقي ٿيندي.

خطي ۾ تازي بحران جو ذڪر ڪندي وزيراعظم چيو ته ان بحران سڄي دنيا لاءِ وڏا مسئلا پيدا ڪيا آهن. پاڪستان آمريڪا ۽ ايران وچ ۾ ثالثي جو اهم ڪردار ادا ڪيو، جنهن لاءِ چين سميت دوست ۽ برادر ملڪن مڪمل تعاون ڪيو. صدر شي جن پنگ خلوص دل سان انهن ڪوششن جي حمايت ڪئي.

وزيراعظم چيو ته پاڪستان آمريڪا ۽ ايران وچ ۾ ”اسلام آباد مفاهمتي ياداشت“ ۾ ثالث آهي. فيلڊ مارشل سيد عاصم منير جي انتھائي محنت کي ساراهيندي هن چيو ته سندس ڪردار تاريخ ۾ ياد رکيو ويندو. وزيراعظم عالمي اڳواڻن سان رابطو ڪرڻ تي نائب وزيراعظم ۽ پرڏيهي وزير سينيٽر محمد اسحاق ڊار جي ڪوششن کي به خراج تحسين پيش ڪيو.

وزيراعظم چيو ته پاڪستان ۽ چين جي دوستي هماليه کان بلند، ماکيءَ کان مٺي ۽ فولاد کان وڌيڪ مضبوط آهي. دواساز ڪانفرنس ۾ چين جي 300 وفدن جي شرڪت کي ڀليڪار ڪندي وزيراعظم چيو ته پاڪستان ۾ چيني شهرين جو تحفظ اسان لاءِ سڀ کان اهم آهي، ان حوالي سان ڪنهن به صورت ۾ سمجهوتو نه ڪيو ويندو، چيني شهري اسان جا مهمان آهن، سندن خوشي اسان جي خوشي آهي.

ڪانفرنس ۾ پاڪستان ۽ چين جي نجي شعبي جي وچ ۾ دواسازي جي شعبن ۾ 440 ملين ڊالر کان وڌيڪ جي 9 معاهدن تي صحيحون ڪيون ويون، جن ۾ مقامي ويڪسين جي پيداوار، بايو ٽيڪنالاجي، دوائن جي پيداوار، ٽيڪنالاجي جي مٽاسٽا ۽ هيپاٽائيٽس جي روڪٿام بابت معاهدا شامل آهن. ان کان علاوه نيشنل اميونائيزيشن پروگرام جي حوالي سان تعاون جو معاهدو پڻ ڪيو ويو.

چيني سيڙپڪار پاڪستان ۾ 700 معاهدا ڪرڻ جي تياري ڪري رهيا آهن: هارون اختر

وزيراعظم جي صنعت ۽ پيداوار بابت خاص مددگار هارون اختر چيو آهي ته چين پاڪستان ۾ سيڙپڪاري لاءِ هميشه اڳيان اڳيان آهي. چيني سيڙپڪار پاڪستان ۾ 700 معاهدا ڪرڻ جي تياري ڪري رهيا آهن.

هن چيو ته وزيراعظم جي چين جي تازي دوري سان اقتصادي تعاون جي هڪ نئين باب جو آغاز ٿيو آهي. وزيراعظم جي چين جي دوري سان سيڙپڪاري، ٽيڪنالاجي جي منتقلي ۽ صنعتي تعاون جا نوان موقعا پيدا ٿيا آهن.

چيني سفير جيانگ زيڊونگ چيو ته چين پاڪستان سان صحت جي شعبي ۾ جديد ٽيڪنالاجي، تحقيق، مقامي پيداوار ۽ صلاحيت وڌائڻ لاءِ مڪمل تعاون جاري رکندو. هن چيو ته پاڪستان ۾ مختلف منصوبن تي تعميراتي ڪم جاري آهي، جنهن سان 20 هزار کان وڌيڪ روزگار جا موقعا پيدا ٿيڻ جي اميد آهي. وزيراعظم شهباز شريف صحت ۽ بائيو ٽيڪنالاجي جي شعبن تي خاص ڌيان ڏئي رهيو آهي.

چيني سفير چيو ته پاڪستان ۾ صحت جي سهولتن جي گهرج ۾ مسلسل اضافو ٿي رهيو آهي، پاڪستان ۾ صحت جي شعبي ۾ ترقي جا وسيع امڪان موجود آهن، پاڪستان جون 29 دواسازي جون شيون چين جي مارڪيٽ ۾ اچي چڪيون آهن، اسان ٻنهي ملڪن جي ادارن وچ ۾ پل جو ڪردار ادا ڪنداسين، ادارن کي معياري خدمتون فراهم ڪنداسين.

ڪانفرنس دوران سيڙپڪارن جي سهولت لاءِ ڊريپ، بورڊ آف انويسٽمينٽ ۽ SIFC جا اسپيشل ڊيسڪ پڻ قائم ڪيا ويا، جتي ريگيوليٽري ۽ لائسنسنگ بابت فوري مدد فراهم ڪئي وئي.

آفيسرن جو چوڻ آهي ته اهي معاهدا پاڪستان ۾ دوائن، ويڪسين ۽ طبي آلات جي مقامي پيداوار وڌائڻ، درآمد تي انحصار گهٽائڻ، روزگار جا نوان موقعا پيدا ڪرڻ ۽ ملڪ کي خطي ۾ دوائن جي پيداوار جو اهم مرڪز بڻائڻ جي لاءِ اهم قدم ثابت ٿيندا.