ايراني پرڏيهي وزير عباس عراقچي چيو آهي ته آبنائے هرمز ۾ تازي ڇڪتاڻ ۽ واقعن ثابت ڪري ڇڏيو آهي ته ڪنهن به سياسي بحران کي فوجي طاقت سان حل نٿو ڪري سگهجي.
سوشل ميڊيا ويب سائيٽ تي پنهنجي بيان ۾ ايراني پرڏيهي وزير چيو ته موجوده صورتحال ۾ سفارتڪاري ئي واحد رستو آهي، جڏهن ته پاڪستان جي ڪوششن سان ايران ۽ آمريڪا وچ ۾ ڳالهين ۾ ڪجهه اڳڀرائي نظر اچي رهي آهي. هن پاڪستان جي ڪردار کي اهم قرار ڏنو.
عباس عراقچي آمريڪا کي خبردار ڪيو ته ان کي اهڙن عنصرن کان محتاط رهڻ گهرجي جيڪي ان کي ٻيهر وڏي تڪرار يا دلدل ۾ ڌڪڻ چاهين ٿا. هن اڻ سڌي طرح خطي جي ٻين ملڪن جو ذڪر ڪيو ۽ يو اي اي کي احتياط ڪرڻ جي صلاح ڏني.
ايراني پرڏيهي وزير آمريڪي منصوبي ’پروجيڪٽ فريڊم‘ تي تنقيد ڪندي چيو ته اهو منصوبو اصل ۾ مسئلو حل ڪرڻ بدران تعطل جو سبب بڻجي رهيو آهي، ان کي ’پروجيڪٽ ڊيڊ لاڪ‘ قرار ڏنو ويو آهي.
تجزيه نگارن موجب ايران جو بيان اهڙي وقت آيو آهي جڏهن آبنائے هرمز ۾ وڌندڙ ڇڪتاڻ عالمي واپار ۽ توانائي جي ترسيل تي گهرا اثر ڇڏي رهي آهي ۽ خطي ۾ سفارتي ڪوششن جي اهميت وڌي وئي آهي.
