واشنگٽن:
جنگ کان ذليل ۽ خوار هندستان جي مودي حڪومت کي هڪ ڀيرو ٻيهر منهن لڪائڻ جي جاءِ نه ملي رهي آهي ڇو ته آمريڪي صدر ڊونلڊ ٽرمپ پنهنجي تازي بيان ۾ پاڪ-ڀارت جنگ دوران 11 جهازن جي تباهي جو ذڪر ڪيو آهي.
آمريڪي ميڊيا سان ڳالهائيندي صدر ڊونلڊ ٽرمپ هڪ ڀيرو ٻيهر پاڪستان ۽ ڀارت وچ ۾ گذريل سال جنگ جو ذڪر ڪندي چيو ته ٻنهي ملڪن وچ ۾ ڇڪتاڻ دوران 11 جهاز تباهه ٿيا، جڏهن ته بروقت سفارتي ڪوششن سبب ممڪنه ايٽمي تڪرار ٽاريو ويو.
هن چيو ته پاڪستان ۽ ڀارت وچ ۾ وڌندڙ ڇڪتاڻ انتهائي خطرناڪ ٿي چڪي هئي پر جنگبندي جي ڪوششن جي نتيجي ۾ لکين نه پر 3 ڪروڙ ماڻهن جون زندگيون ممڪن تباهي کان بچي ويون.
هن وڌيڪ چيو ته پاڪستان جي وزيراعظم به ساڻس ڳالهه ٻولهه ۾ ان موقف جي حمايت ڪئي ۽ چيو ته جنگ روڪڻ سان لکين ماڻهن جون جانيون بچيون آهن.
صدر ٽرمپ پنهنجي تقرير دوران ملڪي آمريڪي سياست بابت به ڳالهايو ۽ چيو ته هڪ وقت هو جڏهن اسرائيل ۾ سندس منظوري واري ريٽنگ 99 سيڪڙو تائين پهچي وئي هئي.
هن حيرانگي جو اظهار ڪندي چيو ته هن لاءِ اهو سمجهڻ مشڪل هو ته هڪ يهودي ووٽر ڊيموڪريٽڪ پارٽي جي حمايت ڇو ڪندو.
واضح رهي ته ڊونلڊ ٽرمپ ان کان اڳ به ڪيترن ئي موقعن تي اهو موقف ورجائي چڪو آهي ته پاڪستان ۽ ڀارت وچ ۾ جنگ بندي ۾ آمريڪا اهم ڪردار ادا ڪيو ۽ ان دوران جنگي جهازن کي تباهه ڪيو ويو.
ٻئي طرف مودي حڪومت ڊونلڊ ٽرمپ جي انهن بيانن کي نظرانداز ڪرڻ کانسواءِ ڪجهه به نه ڪري سگهي آهي، جڏهن ته ڀارتي اپوزيشن پارٽيون خاص ڪري ڪانگريس انهن بيانن کي مودي حڪومت خلاف هٿيار طور استعمال ڪري رهي آهي.
