ڪراچي:
خانگي سوسائٽي مان 2 ورهين جي ٻارڙي کي ڀنگ لاءِ اغوا ڪرڻ واري ڪيس ۾ عدالت جوابدارن جو 3 ڏينهن جو جسماني رمانڊ منظور ڪري ورتو.
منگھوپير ۾ خانگي سوسائٽي مان 2 ورهين جي اذان جي اغوا ڪيس ۾ گرفتار 3 جوابدارن کي سخت سيڪيورٽي ۾ پوئين دروازي ذريعي عدالت آندو ويو، جتي کين منهن ڍڪي پيش ڪيو ويو.
جڊيشل مئجسٽريٽ غريب فدا حسين ڪيس جي ٻڌڻي بند ڪمري ۾ ڪئي.
ٻڌڻي دوران جاچ آفيسر جوابدار جي جسماني رمانڊ جي درخواست ڪندي عدالت کي ٻڌايو ته مرڪزي جوابدار احتشام ڪيس جي جوابدار جو دوست آهي، جڏهن ته شريڪ جوابدار عبدالوهاب مرڪزي جوابدار جو ڀاءُ آهي.
جاچ آفيسر موجب جوابدار افتخار گهارو ۾ جوابدارن جي سهولتڪاري ڪئي هئي، ان ڪري وڌيڪ جاچ لاءِ جسماني رمانڊ ڏنو وڃي. عدالت رمانڊ جي درخواست تي فيصلو محفوظ ڪري ورتو.
جنهن بعد عدالت فيصلو جاري ڪندي پرائيويٽ هائوسنگ سوسائٽي مان ننڍي ٻارڙي کي اغوا ڪرڻ واري ڪيس ۾ جوابدارن جو 3 ڏينهن جو جسماني رمانڊ منظور ڪري ورتو. پوليس موجب گرفتار جوابدارن ۾ احتشام ۽ سندس ٻه سهولتڪار عبدالحسن ۽ افتخار شامل آهن.
پوليس موجب جوابدار احتشام ٻارڙي جي پيءُ جو دوست آهي ۽ هو پاڻ به ٻارڙي جي ڳولا دوران گهر وارن سان گڏ هو. پوليس جو چوڻ آهي ته جوابدار پنهنجي ڀائٽي ۽ دوست جي مدد سان اغوا جي ڪوشش ڪئي. گهارو واري علائقي مان ڪلفٽن جي اذان بعد بازياب ڪرايو ويو.
پوليس موجب جوابدار احتشام پرڏيهه ۾ رهندڙ دوست جي واٽس اپ نمبر ذريعي ٻارڙي جي پيءُ کان 50 لک رپيا ڀنگ طلب ڪيو هو.
پوليس جو چوڻ آهي ته جوابدار ٻارڙي کي 18 جولاءِ تي نئون ناظم آباد مان گهر ٻاهران اغوا ڪيو هو، جڏهن ته واقعي جو ڪيس منگھو پير ٿاڻي تي داخل ڪيو ويو هو.
