ملڪ ۾ پيٽرول ۽ ڊيزل کانپوءِ جيٽ فيول جي اگهن ۾ به اضافو ڪيو ويو آهي، جنهن سبب هوائي سفر وڌيڪ مهانگو ٿيڻ جو خدشو آهي.
ذريعن موجب حڪومت ڪمرشل جيٽ فيول جي قيمت ۾ 40 رپيا 35 پئسا في ليٽر واڌ ڪري ڇڏي آهي، جنهن کانپوءِ جيٽ فيول جي نئين قيمت 291 رپيا 55 پئسا في ليٽر ٿي وئي آهي.
جيٽ فيول جي قيمت ۾ ان وڏي واڌ کانپوءِ ايئر لائنز پاران هوائي سفر وڌيڪ مهانگو ڪرڻ جو امڪان وڌي ويو آهي.
ذريعن جو چوڻ آهي ته عالمي مارڪيٽ ۾ تيل جي اگهن ۾ واڌ سبب جيٽ فيول مهانگو ٿي ويو آهي.
واضح رهي ته گذريل 2 هفتن دوران جيٽ فيول جي قيمت ۾ 53 رپيا 58 پئسا في ليٽر واڌ ڪئي وئي آهي. اهو اضافو عالمي مارڪيٽ ۾ خام تيل جي اگهن ۾ واڌ جي اثر کي نظر ۾ رکندي ڪيو ويو آهي، جنهن سبب ملڪي سطح تي هوائي جهازن جي قيمتن ۾ نمايان اضافو رڪارڊ ڪيو ويو آهي.
