ڀارتي پنجابي فلم انڊسٽري جي مشهور اداڪارا ايشا ريکي آخرڪار ريپر ۽ ڳائڻي بادشاه سان شادي جي افواهن جي تصديق ڪندي سوشل ميڊيا تي لڳل سمورن افواهن کي ختم ڪري ڇڏيو آهي.
گذريل ڪجهه مهينن کان ميڊيا ۽ مداحن ۾ ٻنهي جي لاڳاپن ۽ شادي جون خبرون هلي رهيون هيون پر هاڻ اداڪارا رومانوي تصوير شيئر ڪري حقيقت واضح ڪري ڇڏي آهي.
ان ڳالهه جو انڪشاف ايشا ريکي انسٽاگرام تي ”آسڪ مون اينيٿنگ“ سيشن دوران هڪ مداح جي سوال جي جواب ۾ ڪيو. هڪ مداح کانئس سوال ڪيو ته جيڪڏهن هو ۽ بادشاه شادي شده آهن ته پوءِ هو هڪ ٻئي کي انسٽاگرام تي فالو ڇو نٿا ڪن، جنهن تي اداڪارا وضاحت ڪئي ته کيس بار بار هڪ ئي سوال اچي رهيو آهي ته ڇا هوءَ شادي شده آهي ۽ ڇا هو واقعي بادشاه جي زال آهي.
سڀني ڳالهين جو جواب ڏيندي اداڪارا واضح لفظن ۾ چيو ته ها مان شادي شده آهيان. جڏهن ته سوشل ميڊيا تي هڪ ٻئي کي فالو نه ڪرڻ بابت سوال تي هن مزاحيه انداز اختيار ڪيو ۽ چيو ته ان سوال جو جواب سندس مڙس کي ڏيڻ گهرجي، بادشاهه کي مخاطب ٿيندي هن لکيو ته پتديو، ماڻهن جا ڪيترائي سوال آهن، مهرباني ڪري جلد انهن جو جواب ڏيو.
ان ئي سيشن دوران هڪ ٻئي مداح سوال ڪيو ته هن شادي جي باوجود بادشاه سان تصوير شيئر ڇو نه ڪئي، جنهن تي ايشا ريڪي رومانوي تصوير پوسٽ ڪري سڀني کي حيران ڪري ڇڏيو. تصوير ۾ ٻنهي کي خوش موڊ ۾ ڏسي سگهجي ٿو، جنهن کانپوءِ سوشل ميڊيا تي مبارڪن جو سلسلو شروع ٿي ويو آهي.
ياد رهي ته ٻنهي جي شادي جي خبر هلندڙ سال 24 مارچ تي سامهون آئي هئي جڏهن ايشا ريکي جي ماءُ پونم ريکي هڪ خانگي تقريب جون تصويرون ۽ وڊيوز شيئر ڪيون هيون. انهن منظرن ۾ بادشاه ۽ ايشا روايتي شادي جي لباس ۾ شادي جون رسمون ادا ڪندي نظر آيون، جنهن کانپوءِ تصويرون تيزيءَ سان وائرل ٿي ويون. بهرحال، ان وقت ٻنهي مان ڪنهن به خبر جي تصديق يا ترديد نه ڪئي هئي.
دلچسپ ڳالهه اها آهي ته شادي جي تصديق جي باوجود، بادشاهه اڃا تائين ان حوالي سان ڪو به سرڪاري بيان جاري ناهي ڪيو. ڪجهه ڏينهن اڳ هن انسٽاگرام تي اڻڄاتل عورت سان گڏ تصويرون شيئر ڪندي لکيو ته ”ڪائنات جو پنهنجو منفرد انداز آهي ماڻهن کي پنهنجي زندگي ۾ آڻڻ جو. جيئن ته تصويرن ۾ عورت جو چهرو واضح ناهي، مداح اڃا تائين سندس سڃاڻپ ڳولڻ جي ڪوشش ڪري رهيا آهن.
ايشا ريخي پنجابي فلم انڊسٽري جو هڪ مشهور نالو آهي، جنهن پنهنجي فلمي ڪيريئر جي شروعات 2013ع ۾ ڪئي ۽ ڪيترين ئي پنجابي ۽ هندي فلمن ۾ ڪم ڪري چڪي آهي. ٻئي طرف، بادشاه هندستاني موسيقي جي صنعت ۾ سڀ کان وڏو نالو آهي. ميڊيا رپورٽن موجب هن جي پهرين شادي جيسمين مسيح سان ٿي هئي، جنهن مان کيس هڪ ڌيءَ به آهي، جڏهن ته 2020 ۾ سندن الڳ ٿيڻ جون خبرون به سامهون آيون هيون.
