نئين مالي سال 2026-27 ۾ حڪومت جي ترجيحن ۾ شامل وڏن منصوبن جا تفصيل سامهون اچي ويا آهن.
وفاقي حڪومت ايندڙ مالي سال جي ترقياتي بجيٽ ۾ بنيادي ڍانچي ۽ عوامي ڀلائي جي منصوبن کي مڪمل ڪرڻ لاءِ اهم مالي وسيلا مختص ڪرڻ جو فيصلو ڪيو آهي.
بجيٽ دستاويزن موجب ملڪ جي مواصلاتي نظام جي بهتري لاءِ اربين رپين جي وڏي رقم رکي وئي آهي. اين 25 ڪوئيٽا روڊ لاءِ 100 ارب رپيا رکيا ويا آهن. سکر-حيدرآباد موٽر وي لاءِ 30 ارب رپيا رکيا ويا آهن. مهراڻ هاءِ وي لاءِ 21 ارب رپيا رکيا ويا آهن. سنڌ ڪوسٽل هاءِ وي لاءِ 25 ارب رپيا رکيا ويا آهن، جنهن سان تعميراتي شعبي ۾ نئين جان ڦٽي ويندي.
اهڙي طرح توانائي جي شعبي ۾ خود انحصاري حاصل ڪرڻ لاءِ مهمند ڊيم هائيڊرو پاور پراجيڪٽ لاءِ 26 ارب رپيا ۽ داسو هائيڊرو پاور پراجيڪٽ لاءِ 21 ارب رپيا رکيا ويا آهن.
ان کان علاوه ريلوي نظام کي جديد خطوط تي استوار ڪرڻ جي مقصد لاءِ ايم ايل ون منصوبي لاءِ 25 ارب رپيا مختص ڪيا ويا آهن.
نئين سال جي بجيٽ ۾ شهري سهولتن ۽ انساني ترقي تي به خاص ڌيان ڏنو ويو آهي.
ڪراچي بلڪ واٽر سپلاءِ اسڪيم لاءِ 10 ارب رپيا، دانش اسڪولن جي نيٽ ورڪ جي تعمير ۽ توسيع لاءِ 22 ارب رپيا ۽ وزيراعظم جي نيشنل هيلٿ پروگرام تحت طبي سهولتن جي فراهمي لاءِ 3 ارب رپيا رکيا ويا آهن.
