پاڪستان جي مشهور اداڪارا ۽ ميزبان عائشه عمر ڪراچي کي دنيا جي گهٽ رهڻ لائق شهرن ۾ شمار ڪرڻ تي رد عمل ظاهر ڪندي چيو آهي ته هن شهر ۾ رهندڙ ماڻهو دراصل ڪنهن اعزاز يا ميڊل جا مستحق آهن. هن چيو ته ڪراچي جا رهواسي جن حالتن ۾ روز زندگي گذاري رهيا آهن اهي ڪنهن وڏي امتحان کان گهٽ ناهن.
اهو ردعمل برطانوي تحقيقي اداري دي اڪانومسٽ انٽيليجنس يونٽ (EIU) پاران جاري ڪيل گلوبل لائيوبليبلٽي انڊيڪس 2026 کانپوءِ سامهون آيو آهي، جنهن ۾ ڪراچي کي دنيا جو چوٿون بدترين شهر قرار ڏنو ويو آهي. عائشه عمر پنهنجي انسٽاگرام اسٽوري تي ان رپورٽ بابت هڪ پوسٽ شيئر ڪئي ۽ لکيو ته رينڪنگ کيس ڪنهن به طرح حيران نه ڪيو.
اداڪارا ڪراچي جي شهرين کي خراج تحسين پيش ڪندي چيو ته هو ٽٽل ۽ آلوده روڊن تي سفر ڪن ٿا، ڪلاڪ ڪلاڪ ٽريفڪ جام کي منهن ڏين ٿا، گئس ۽ بجلي جي مسلسل کوٽ جو شڪار آهن، هميشه ڏوهن ۽ ڦرلٽ جي خوف جي ڇانو هيٺ زندگي گذارين ٿا، ان جي باوجود هو محنت ڪن ٿا، ٽيڪس ادا ڪن ٿا ۽ ملڪي معيشت ۾ پنهنجو ڀرپور ڪردار ادا ڪن ٿا. سندس چوڻ موجب اهڙين حالتن ۾ رهڻ بذات خود هڪ وڏي ڪاميابي آهي.
عائشه عمر ماضي ۾ مختلف سماجي ۽ عوامي مسئلن تي سخت موقف اختيار ڪندي رهي آهي. تازو ئي هوءَ عورتن بابت بي بي سي جي هڪ رپورٽ جو حصو هئي، جنهن ۾ هن مصنوعي ذهانت ۽ ٽيڪنالاجي ڪمپنين تي زور ڀريو ته هو آن لائين تصويرن ذريعي عورتن کي هراسان ڪرڻ جهڙن مسئلن کي سنجيدگيءَ سان وٺن ۽ اثرائتو قدم کڻن.
عائشه عمر، جيڪا اداڪاري سان گڏ سماجي خدمتن ۾ به سرگرم آهي، هڪ غير منافع بخش تنظيم جي خير سگالي سفير آهي، جيڪا پاڪستان ۾ غريب ٻارن جي تعليم جي واڌاري لاءِ ڪم ڪري ٿي. سندس تازي فلم ”ميرا لياري“ پڻ سماجي مسئلن، نوجوانن کي درپيش چيلنجز، ڏوهن ۽ غربت، اميد ۽ بهتر مستقبل جي پيغام سان گڏ آهي.
