ڪراچي:
شهر قائد ۾ نارٿ ايسٽ ڪراچي پمپنگ اسٽيشن تي ڪي اليڪٽرڪ جي مين ڪيبل جي چوري سبب پيدا ٿيل پاڻي جو بحران رات دير سان بجلي بحال ٿيڻ بعد ختم ٿي ويو، جڏهن ته شهر جي مختلف علائقن کي پاڻي جي فراهمي بحال ٿي وئي.
واٽر ڪارپوريشن جي ترجمان موجب نارٿ ايسٽ ڪراچي پمپنگ اسٽيشن کي بجلي فراهم ڪندڙ مين ڪيبل آچر جي صبح ساڍي 10 وڳي چوري ٿي وئي، جنهن سبب پمپنگ اسٽيشن جي بجلي معطل ٿي وئي ۽ آپريشنل سرگرميون سخت متاثر ٿيون.
واقعي کانپوءِ صدر، ڪلفٽن، چنيسر ٽائون، سرجاني ٽائون ۽ نيو ڪراچي سميت ڪيترن ئي علائقن ۾ پاڻي جي فراهمي متاثر ٿي وئي، جنهن تي شهرين کي ڏکيائين کي منهن ڏيڻو پيو.
ترجمان موجب ڪي اليڪٽرڪ ۽ واٽر ڪارپوريشن جي گڏيل ڪوششن سان رات دير سان بجلي بحال ڪئي وئي، جنهن بعد پمپنگ اسٽيشن تان پاڻي جي فراهمي بحال ڪئي وئي.
واٽر ڪارپوريشن جو چوڻ آهي ته متاثر علائقن ۾ پاڻي جي فراهمي کي مرحليوار معمول تي آندو پيو وڃي ۽ جلد سمورن علائقن ۾ پاڻي جي فراهمي مڪمل طور تي بحال ٿي ويندي.
