اسلام آباد:
چيف جسٽس آف پاڪستان جسٽس يحيٰ آفريدي چيو آهي ته جج انتهائي ڏکين حالتن ۾ اهم ذميواريون سرانجام ڏيندا آهن.
عدالتي ڀلائي جي عالمي ڏينهن جي موقعي تي پنهنجي پيغام ۾ چيف جسٽس چيو ته عدالتي ڀلائي جو عالمي ڏينهن اسان کي ياد ڏياري ٿو ته مضبوط انصاف واري نظام جو بنياد نه رڳو قانون ۽ ادارا آهن پر ججن جي ڀلائي به آهي، عدالتي ڀلائي ڪو انفرادي مسئلو نه پر عدالتي آزادي، اداري جي سالميت ۽ قانون جي حڪمراني تي عوام جي اعتماد جو بنياد آهي.
چيف جسٽس چيو ته ججن کي آزاد، غيرجانبدار ۽ معياري انصاف فراهم ڪرڻ لاءِ مضبوط ادارن جي سهڪار جي ضرورت آهي، پيشه ورانه ترقي، جديد عدالتي ماحول ۽ موثر انتظامي نظام عدالتي ڪارڪردگيءَ لاءِ ناگزير آهي، پاڪستان جي عدليه پنهنجي سڌاري واري ايجنڊا ۾ عدالتي ڀلائي کي اولين اهميت ڏئي رهي آهي.
هن چيو ته ڊجيٽل ٽرانسفارميشن، بهتر عدالتي انفراسٽرڪچر، ادارن جي سهڪار ۽ عدالتي تعليم سڌارن جي ايجنڊا جو حصو آهن، ججن کي مضبوط ڪرڻ دراصل انصاف جي نظام کي مضبوط ڪرڻ آهي.
پنهنجي پيغام ۾ چيف جسٽس سڄي ملڪ جي ججن جي ايمانداري، عزم ۽ پيشه ورانه خدمتن کي خراج تحسين پيش ڪيو.
