ڪرن جوهر جي تمام گهڻي انتظار واري فلم ”دوستانا 2“ هڪ ڀيرو ٻيهر مشڪلاتن جو شڪار ٿي وئي آهي ۽ هن ڀيري فلم کي وڏو ڌڪ لڳو جڏهن ته هدايتڪار ادويت چندن ان پروجيڪٽ کان پري ٿي ويو. ڀارتي ميڊيا رپورٽن موجب فلم کي اڳ ۾ ئي وڏو جھٽڪو ان وقت لڳو جڏهن اداڪار ڪارٿڪ آريان پروجيڪٽ مان واڪ آئوٽ ڪيو، جنهن کانپوءِ پروجيڪٽ کي روڪيو ويو. بعد ۾ اها خبر به سامهون آئي ته اداڪارا جھانوي ڪپور به ان فلم جو حصو نه آهي. هاڻ تازيون خبرون سامهون آيون آهن ته فلم جي هدايتڪاري ٽيم پڻ وڃائي چڪي آهي. معروف بين الاقوامي پورٽل ورائٽي انڊيا موجب، ادويت چندن تقريباً ستن مهينن تائين پروڊڪشن تي ڪم ڪرڻ کان پوءِ ذاتي ۽ تخليقي اختلافن سبب فلم کان ڌار ٿي ويو آهي. ذريعن جو چوڻ آهي ته سندن فيصلي جي پويان ڪو وڏو تڪرار نه هو پر تخليقي سوچ ۾ اختلاف کين پراجيڪٽ کان الڳ ٿيڻ تي مجبور ڪيو. رپورٽن ۾ اها به دعويٰ ڪئي وئي آهي ته سيني شيٽي، جيڪا هن فلم سان بالي ووڊ ۾ ڊيبيو ڪندي، کي مرڪزي ڪردار لاءِ فائنل ڪيو ويو آهي. سيني شيٽي مس انڊيا ورلڊ 2022 ٿي چڪي آهي ۽ هاڻي هوءَ پنهنجي فلمي ڪيريئر جي شروعات هن وڏي پروجيڪٽ سان ڪندي. ٻڌايو پيو وڃي ته ”دوستانا 2“ جي ڪهاڻي ٻن ڀينرن جي چوڌاري گهمي ٿي، جيڪي هڪ ئي شخص سان پيار ۾ پئجي وڃن ٿا، جنهن جي نتيجي ۾ ڪهاڻي رومانوي الجھنن، مزاح ۽ مونجهارن سان ڀريل آهي. ان کان اڳ اداڪار وڪرانت ميسي هڪ انٽرويو ۾ فلم ۾ شامل ٿيڻ جي تصديق ڪندي چيو هو ته هو ڪرن جوهر جي پروڊڪشن هائوس سان ڊيبيو ڪري رهيو آهي. ٻئي طرف ڪجهه رپورٽن ۾ اها به دعويٰ آهي ته اداڪار لکشيا پروجيڪٽ جو حصو نه هوندو، جڏهن ته فلم جي مڪمل ڪاسٽ جو اڃا تائين باضابطه اعلان ناهي ڪيو ويو پروڊڪشن ٽيم طرفان. اهڙي طرح ’دوستانه 2‘ پنهنجي شروعات کان وٺي مسلسل تبديلين ۽ غير يقيني صورتحال جو شڪار آهي، پر فلم جا مداح اڃا تائين ان جي حتمي اعلان ۽ رليز جو انتظار ڪري رهيا آهن.
Source link
Leave a Comment Leave a Comment
