صحت واري وفاقي وزير مصطفيٰ ڪمال چيو آهي ته ڪروڙين ڊالر خرچ ڪرڻ باوجود ويڪسين بابت عوام ۾ ناڪاري رجحان ۾ گهٽتائي ناهي آئي.
صحت واري وفاقي وزير مصطفيٰ ڪمال جي صدارت هيٺ اعليٰ سطحي اجلاس ٿيو، جنهن ۾ هن چيو ته يونيسيف پاران ڪروڙين ڊالر خرچ ڪرڻ باوجود ويڪسين بابت ناڪاري رجحان برقرار آهي. آگاهي مهم جو بنيادي مقصد ويڪسين کان انڪار جي شرح کي گهٽائڻ آهي.
هن وڌيڪ چيو ته ويڪسين بابت عوام جي ذهنن مان ناڪاري پروپيگنڊا ختم ڪرڻ جي ضرورت آهي. پاڪستان جي نالي تي خرچ ٿيندڙ ڪروڙين ڊالر اسان جي ڪلهن تي بار آهن، انهن پئسن جو صحيح ۽ موثر استعمال رياست ۽ صحت واري وزارت جي ذميواري آهي.
هن وڌيڪ چيو ته ان مقصد کي حاصل ڪرڻ لاءِ ڪيترائي اجلاس منعقد ڪيا ويا آهن. حقيقي معنى ۾، صحت جي سار سنڀار جو مقصد ماڻهن کي بيمارين کان بچائڻ آهي. صحت واري وزارت ماڻهن کي بيمارين کان بچائڻ لاءِ خاص ڌيان ڏئي رهي آهي.
هن چيو ته فنڊن جي صحيح استعمال سان نه رڳو مثبت تبديلي ممڪن آهي پر ويڪسين بابت ناڪاري رجحانن کي به ختم ڪري سگهجي ٿو. ويڪسين تي عوام جو اعتماد بحال ڪرڻ ۽ شفافيت، احتساب ۽ نتيجن تي ٻڌل قدمن کي يقيني بڻائڻ لاءِ هڪ جامع حڪمت عملي جوڙي وڃي.
