دنيا جي مختلف ملڪن ۾ غير قانوني افغانين خلاف ڪريڪ ڊائون جاري آهي، جڏهن ته ترڪي ۾ گرفتارين جو نئون لهر شروع ٿي ويو آهي.
يورپ ۾ افغانين جي انساني اسمگلنگ هڪ وڏي سيڪيورٽي چيلنج بڻجي سامهون آئي آهي.
افغان جرنل ”افغان انٽرنيشنل“ موجب ترڪ اختيارين غير قانوني طور ترڪي کان يورپ وڃڻ جي ڪوشش ڪندڙ 24 افغانين کي گرفتار ڪري ورتو. ترڪي جي شهر ادرين مان گرفتار افغان شهرين ۾ 7 عورتون ۽ 6 ٻار به شامل آهن.
افغان ميڊيا موجب ترڪ پوليس افغان شهرين کي غير قانوني طور منتقل ڪرڻ تي بس ڊرائيور کي به گرفتار ڪري ورتو آهي. ترڪ مائيگريشن ايجنسي موجب هلندڙ سال جي پهرين 5 مهينن دوران 16 هزار 436 افغان شهرين کي رهواسي ڪارڊ نه هجڻ تي حراست ۾ ورتو ويو آهي.
ياد رهي ته 2 ڏينهن اڳ پولش اختيارين غير قانوني طور ملڪ ۾ داخل ٿيندڙ 15 افغانين کي به گرفتار ڪيو هو.
برٽش براڊ ڪاسٽنگ ڪارپوريشن افغانين جي غير قانوني لڏپلاڻ لاءِ طالبان حڪومت جي سخت پاليسين ۽ انتقامي ڪاررواين کي ذميوار قرار ڏنو آهي. افغانين جون تازيون گرفتاريون ان حقيقت جي عڪاسي آهن ته دنيا جا مختلف ملڪ انهن جي غير قانوني موجودگي کي وڌيڪ برداشت ڪرڻ لاءِ تيار نه آهن.
