گذريل هڪ سال دوران پاڪستان جي اندروني ۽ بيروني قرضن ۾ 5904 ارب رپين جو اضافو ٿيو آهي.
ايڪسپريس نيوز موجب گذريل هڪ سال دوران قرضن جي بار ۾ 5 هزار 904 ارب رپين جو اضافو ٿيو آهي ۽ پاڪستان تي قرضن جو مجموعي حجم 81 هزار 949 ارب رپيا ٿي ويو آهي.
رپورٽ ۾ چيو ويو آهي ته هلندڙ مالي سال ۾ قرضن تي 8 هزار 54 ارب رپين جو سود به ادا ڪرڻو پوندو.
اهڙي طرح مختصر مدي وارن پرڏيهي قرضن ۾ 2 هزار 491 ارب رپين جو غير معمولي اضافو ٿيو آهي.
ٻئي طرف آڊيٽر جنرل آف پاڪستان به قرضن جي بدانتظامي تي سوال اٿاريا آهن ۽ رپورٽ ۾ چيو ويو آهي ته قرضن جي اصل رقم جي واپسي لاءِ 83 ارب رپين کان وڌيڪ جي غير حقيقي بجيٽ رکي وئي، نتيجي ۾ غير ضروري اضافي خرچ ٿيا.
آڊٽ رپورٽ ۾ اهو به انڪشاف ڪيو ويو آهي ته حڪومت مالياتي رپورٽنگ مينوئل موجب مهيني جي قرضن ۽ نقصانن جي رپورٽ تيار نه ڪري رهي آهي، جڏهن ته اها رپورٽ هر مهيني قومي قرضن جي مجموعي صورتحال جو جائزو وٺڻ لاءِ گهربل هوندي آهي.
