فقير:
گرين پاڪستان انيشيئيٽو تحت، ڀکر جي بنجر ۽ ريلي واري علائقي ۾ هڪ حيرت انگيز تبديلي ڏسڻ ۾ آئي آهي، جتي ڪجهه مهينا اڳ ريلي جي اونچين ٿنڀن تي مشتمل زمين کي جديد زرعي ۽ برآمدي مرڪز ۾ تبديل ڪيو ويو آهي.
منصوبي سان لاڳاپيل ڪمپني پينٽيرا لميٽيڊ جي سي اي او فرقان علي اختر موجب 1800 ايڪڙن تي ٻڌل جديد زرعي فارم صرف 60 ڏينهن ۾ تيار ڪيو ويو، جيڪو پنهنجي قسم جو هڪ منفرد مثال آهي.
هن چيو ته فارم تي 13 سينٽرل پيوٽ سسٽم ۽ 2.4 ميگاواٽ هائبرڊ سولر سسٽم ذريعي جديد آبپاشي نظام لڳايو ويو آهي.
چيف آپريٽنگ آفيسر فاروق سعيد موجب 4 مهينا اڳ هيءَ زمين 20 کان 50 فوٽ اوچائي واريءَ جي دڙن تي مشتمل هئي، پر جديد ٽيڪنالاجي ۽ مربوط حڪمت عملي ذريعي ان کي ٿوري ئي عرصي ۾ پوکڻ لائق بڻايو ويو.
هن چيو ته 1800 ايڪڙن مان 1300 ايڪڙن تي ڪڻڪ ۽ روڊس گراس پوکيو ويو آهي جڏهن ته روڊس گراس به برآمد ڪيو پيو وڃي جنهن سان زرعي معيشت کي هٿي ملي رهي آهي.
فاروق سعيد چيو ته گرين پاڪستان انيشيٽو جي ڀرپور حمايت، مضبوط انفراسٽرڪچر ۽ بروقت مسئلن جي حل هن منصوبي جي ڪاميابي ۾ اهم ڪردار ادا ڪيو.
ان کان علاوه گرين ايگري مال ذريعي معياري ٻج، ڀاڻ ۽ ٻين زرعي سهولتن جي شفاف ۽ بروقت فراهمي کي يقيني بڻايو ويو.
هن اهو به انڪشاف ڪيو ته ان منصوبي تحت پاڪستان ۾ پهريون ڀيرو چيني ڪمپنين جي سهڪار سان هائبرڊ ٻج متعارف ڪرايا ويا آهن، جنهن سان زرعي پيداوار ۾ نمايان اضافو ٿي رهيو آهي.
