واشنگٽن:
وچ اوڀر ۾ جاري ڇڪتاڻ جي وچ ۾، ايران ۽ آمريڪا جي وچ ۾ ممڪن سفارتي ترقي جي حوالي سان نوان تفصيل سامهون آيا آهن.
وال اسٽريٽ جرنل دعويٰ ڪئي آهي ته تهران جنگ جي جواب ۾ محدود مدي لاءِ يورينيم جي افزودگي کي روڪڻ تي راضي ٿي ويو آهي پر آمريڪا جي ڊگهي مدي واريون شرطون مڃڻ کان انڪار ڪري ڇڏيو آهي.
رپورٽ موجب واشنگٽن ايران کان 20 سالن تائين يورينيم افزودگي نه ڪرڻ جو مطالبو ڪيو هو، جنهن کي ايراني قيادت رد ڪري ڇڏيو هو.
ذريعن جو چوڻ آهي ته ايران پنهنجي ردعمل ۾ مرحليوار جنگبندي، آبنائے هرمز کي بتدريج کولڻ ۽ ايندڙ 30 ڏينهن اندر نئين ڳالهين جي شروعات جي به تجويز ڏني آهي.
آمريڪي اخبار موجب تهران واضح ڪيو آهي ته جيڪڏهن پابنديون هٽايون ويون ۽ بحري بندش هٽائي وئي ته خطي ۾ ڇڪتاڻ گهٽائڻ ۾ اڳڀرائي ٿي سگهي ٿي.
ان سان گڏ ايران پنهنجي منجمد اثاثن کي بحال ڪرڻ ۽ تيل جي برآمد تي لڳل پابنديون فوري طور ختم ڪرڻ جو مطالبو پڻ ڪيو آهي.
ٻئي طرف ايراني سرڪاري ذريعن وال اسٽريٽ جرنل جي رپورٽ کي گمراهه ڪندڙ قرار ڏيندي چيو آهي ته آمريڪي اخبار ايٽمي معاملي سان لاڳاپيل اهم نقطن کي درست انداز ۾ پيش نه ڪيو.
ايران جي سرڪاري نيوز ايجنسي جي مطابق تهران جي اصل موقف ۾ فوري ۽ مڪمل جنگبندي جا مطالبا شامل آهن، مستقبل ۾ ڪنهن به حملي جي خلاف ضمانت، سڀني معاشي پابندين کي ختم ڪرڻ ۽ معاهدي تي صحيح ٿيڻ کان پوءِ بحري بندش جو خاتمو شامل آهي.
ايراني ذريعن جو چوڻ آهي ته تهران پنهنجي ردعمل ۾ اهو به واضح ڪيو آهي ته آمريڪا جو ائٽمي تنصيب ختم ڪرڻ يا ايٽمي پروگرام مڪمل طور بند ڪرڻ جو مطالبو قبول نه ڪيو ويندو.
