اسلام آباد:
نئين مالي سال جي بجيٽ ۾ وڌيڪ دير ٿي رهي آهي ۽ هاڻي 12 جون تي پيش ٿيڻ جو امڪان آهي.
ذريعن موجب ايندڙ مالي سال جي وفاقي بجيٽ جي تياري ۾ اهم اڳڀرائي ٿي آهي، جڏهن ته بجيٽ پيش ڪرڻ ۾ وڌيڪ دير جو امڪان ظاهر ڪيو پيو وڃي. وفاقي بجيٽ 10 جون بدران 12 جون تي پيش ڪرڻ جو امڪان آهي.
ذريعن جو چوڻ آهي ته حڪومت قومي اقتصادي ڪائونسل جو اڄوڪو اجلاس ملتوي ڪرڻ جو فيصلو ڪيو آهي. اجلاس ۾ ايندڙ مالي سال جي قومي ترقياتي بجيٽ جي منظوري لاءِ اهم تجويزون پيش ڪيون وينديون پر اجلاس ملتوي ڪيو ويو.
حڪومتي ذريعن موجب اجلاس جي صدارت وزيراعظم شهباز شريف ڪرڻي هئي، جڏهن ته اجلاس جي نئين شيڊول جو اعلان بعد ۾ ڪيو ويندو.
ياد رهي ته قومي اقتصادي ڪائونسل جي اجلاس ۾ ترقياتي بجيٽ ۽ ترقياتي ترجيحن جو جائزو ورتو ويندو. ان کان علاوه وفاقي وزارتن ۽ صوبن جي ترقياتي منصوبن تي بريفنگ ڏني وئي، جڏهن ته سالياني ترقياتي پروگرام ۽ معاشي ترقي جي شرح جي هدف تي به غور ڪيو ويو.
اجلاس ۾ ترقياتي بجيٽ ۽ اقتصادي هدفن جي باضابطه منظوري قومي اقتصادي ڪائونسل کان وٺڻي هئي.
ذريعن جو چوڻ آهي ته نئين مالي سال جي تجويز ڪيل ترقياتي بجيٽ جو ڪل حجم 4 هزار 715 ارب رپيا رکيو ويو آهي. ان ۾ وفاقي پبلڪ سيڪٽر ڊولپمينٽ پروگرام (پي ايس ڊي پي) لاءِ 1126 ارب رپيا جڏهن ته صوبائي ترقياتي منصوبن لاءِ 3 هزار 138 ارب رپيا رکڻ جي تجويز ڏني وئي آهي.
ان کان علاوه سرڪاري ادارا 451 ارب رپيا الڳ الڳ ترقياتي اسڪيمن تي خرچ ڪندا.
ذريعن جو اهو به چوڻ آهي ته اجلاس ۾ 1126 ارب رپين جي ترقياتي بجيٽ ۾ وڌيڪ 200 ارب رپيا شامل ڪرڻ جي تجويز غور هيٺ آهي. وزيراعظم جي منظوري جي صورت ۾ پي ايس ڊي پي جو مجموعي حجم 1326 ارب رپيا ٿي سگهي ٿو.
