افغانستان ۾ انصاف جو مطالبو ڪرڻ ڏوهه بڻجي ويو آهي، جتي افغان شهرين کي طالبان جي حڪومت پاران دهشتگردي جو نشانو بڻايو پيو وڃي.
طالبان جي حڪمرانن قانون ۽ انصاف کي نظرانداز ڪري پنهنجي ئي شهرين جي زندگي جهنم بڻائي ڇڏي آهي. افغان ميڊيا ۽ سوشل ميڊيا تي وائرل ٿيندڙ وڊيوز طالبان جي حڪومت جي دهشتگردي ۽ انتهاپسندي کي بي نقاب ڪري ڇڏيو آهي.
افغان ميڊيا موجب افغان صوبي هرات ۾ حڪومت جي ظلمن خلاف احتجاج ڪندڙ مظاهرين تي طالبان فورسز فائرنگ ڪري ڏني، جڏهن ته طالبان فورسز جي انڌاڌنڌ فائرنگ سبب هڪ شخص مارجي ويو ۽ 22 ڄڻا سخت زخمي ٿي پيا.
رپورٽن مطابق گذريل ڏينهن هرات ۾ طالبان حڪومت پاران عورتن جي گرفتارين خلاف احتجاج ڪيو پيو وڃي. ڇڪتاڻ وڌي وئي، قابض طالبان حڪومت احتجاج کي روڪڻ لاءِ علائقي ۾ اضافي فوج موڪلي ڇڏي.
سوشل ميڊيا تي وائرل ٿيل وڊيو ۾ ڏسي سگهجي ٿو ته طالبان اهلڪار افغان شهرين کي تلاشي جي نالي تي حراسان ڪري رهيا آهن.
ماهرن جو چوڻ آهي ته طالبان حڪومت شريعت جي آڙ ۾ پنهنجن حقن لاءِ اٿندڙ آواز کي بندوق جي زور تي دٻائڻ جي ناڪام ڪوشش ڪري رهي آهي. هرات جي روڊن تي وهندڙ معصوم شهرين جو رت افغان طالبان جي راڄ جي ظلم ۽ جبر جي خاتمي جو اڳڪٿي ثابت ٿيندو.
