ڪالا هارن تڪرار، سلمان خان عدالت پهچي ويو، گووند نامديو کي قانوني نوٽيس

بالي ووڊ سپر اسٽار سلمان خان سان منسوب فلم ”ڪالا هارن“ جا تڪرار شدت اختيار ڪري ويا آهن. هڪ طرف سلمان خان فلم جي رليز روڪڻ لاءِ عدالت سان رجوع ڪري ورتو آهي ته ٻئي طرف سينيئر اداڪار گووند نامديو به فلم مان نڪرڻ جو اعلان ڪري ڇڏيو آهي، پروڊيوسر طرفان کيس قانوني نوٽيس به موڪليو ويو آهي. ڀارتي ميڊيا رپورٽن موجب فلم جي پروڊيوسر اميت جاني دعويٰ ڪئي آهي ته گووند نامديو کي 7 ڏينهن اندر عوامي معافي ۽ پروڊڪشن هائوس کي 50 لک رپيا هرجاڻي ادا ڪرڻ جو نوٽيس جاري ڪيو ويو آهي. پروڊيوسر جو چوڻ آهي ته مقرر وقت اندر جواب نه ڏيڻ جي صورت ۾ وڌيڪ قانوني ڪارروائي ڪئي ويندي. فلم پنهنجي شروعات کان وٺي خبرن ۾ آهي ڇاڪاڻ ته ان کي 1998 جي مشهور ڪاري هرڻ جي شڪار ڪيس سان ڳنڍيو پيو وڃي، جنهن ۾ سلمان خان جو نالو سامهون آيو هو. تڪرار تڏهن وڌيو جڏهن فلم جي پروموشنل مواد ۾ ”ايان خان“ نالي هڪ ڪردار کي متعارف ڪرايو ويو، جنهن کي ڪيترن ئي حلقن سلمان خان سان مشابهت رکندڙ قرار ڏنو. اداڪار گووند نامديو تازو ئي هڪ انٽرويو ۾ دعويٰ ڪئي هئي ته فلم جي اصل موضوع بابت کيس اوندهه ۾ رکيو ويو هو. سندس چوڻ هو ته جڏهن هن ٽريلر ڏٺو ته هو حيران ٿي ويو ڇاڪاڻ ته کيس جيڪا ڪهاڻي ٻڌائي وئي هئي، اها مڪمل ٿي فلم بلڪل مختلف هئي. هن چيو ته شروعات ۾ کيس ٻڌايو ويو هو ته هو ’سمبول‘ نالي فلم جو حصو بڻجندي، پر بعد ۾ پلان مڪمل طور تبديل ٿي ويو. گووند نامديو جي مطابق، هن کي صرف هڪ ڊگهي عدالتي ڪيس جي بنياد تي ڪردار بابت ٻڌايو ويو ۽ يقين ڏياريو ويو ته فلم ۾ صرف مواد شامل ڪيو ويندو جيڪو عدالتي رڪارڊ جو حصو هو. سندس چوڻ هو ته جيڪڏهن کيس خبر هجي ها ته فلم اهڙي نموني پيش ڪئي ويندي ته هو ڪڏهن به ان جو حصو نه بڻجي ها. ٻئي طرف پروڊيوسر اميت جاني انهن الزامن کي رد ڪندي موقف اختيار ڪيو آهي ته گووند نامديو فلم جي اسڪرپٽ ۽ هدايتڪاري کان مڪمل واقف هو. هن جي دعويٰ آهي ته اداڪار نه رڳو سڄو اسڪرپٽ پڙهيو هو پر ان سان گڏ ڪورٽ جا منظر به شوٽ ڪيا هئا، جنهن سان ڪهاڻي جي پس منظر کي چڱيءَ ريت سمجهه ۾ اچي ها. پروڊيوسر موجب گووند نامديو معاهدي جي ڀڃڪڙي ڪري رهيو آهي ۽ سلمان خان جي تڪرار کان پاڻ کي پري رکڻ لاءِ اهو موقف اختيار ڪري رهيو آهي. ان دوران سلمان خان به دهلي هاءِ ڪورٽ سان رجوع ڪري فلم جي نمائش روڪڻ لاءِ درخواست داخل ڪئي آهي. سندس وڪيل دليل ڏنو ته فلم ڪاري هرڻ جي شڪار ڪيس کان متاثر آهي ۽ اداڪار جي شخصيت ۽ سڃاڻپ کي بغير اجازت استعمال ڪري رهيو آهي. عدالت فلم جي پروڊيوسر اميت جاني، اڪشي پانڊي ۽ ٻين لاڳاپيل ڌرين کي نوٽيس جاري ڪري ڇڏيا آهن جڏهن ته ڪيس جي ٻڌڻي 19 جون تي متوقع آهي، سخت تڪرارن جي باوجود فلمساز اڃا تائين دعويٰ ڪري رهيا آهن ته ”ڪالا هار“ هڪ افسانوي ڪهاڻي تي ٻڌل فلم آهي. فلم جي ترديد ۾ چيو ويو آهي ته سڀئي ڪردار ۽ واقعا افسانوي آهن ۽ ڪنهن به حقيقي شخص يا واقعي سان ڪا به مشابهت خالص طور تي اتفاقي آهي، جيتوڻيڪ ڪهاڻي کي جزوي طور تي 1998 جي ڪاري هرڻ جي شڪار واري واقعي کان متاثر ڪيو وڃي ٿو.



Source link