ايشيائي ترقياتي بئنڪ (ADB) انشورنس ٽرانسفارميشن پروگرام جي ذيلي پروگرام SP One تحت پاڪستان کي 700 ملين ڊالر فراهم ڪندو. اقتصادي معاملن واري وزارت جي ترجمان موجب پاڪستان ۽ ايشيائي ترقياتي بئنڪ (اي ڊي بي) وچ ۾ انشورنس ٽرانسفارميشن پروگرام جي ذيلي پروگرام ايس پي ون تحت 700 ملين ڊالرن جي پاليسي بيسڊ قرض جو معاهدو ڪيو ويو آهي. ترجمان چيو ته ADB کان وصول ٿيندڙ رقم مان 250 ملين ڊالر رعايتي شرطن تي فراهم ڪيا ويندا. معاهدي تي پاڪستان جي اقتصادي معاملن واري سيڪريٽري محمد حمير ڪريم جڏهن ته ايشيائي ترقياتي بئنڪ جي ڊپٽي ڪنٽري ڊائريڪٽر حسين حيدر معاهدي تي صحيحون ڪيون. ان موقعي تي ڳالهائيندي اقتصادي معاملن واري سيڪريٽري محمد حمير ڪريم ايشيائي ترقياتي بئنڪ کي پاڪستان جو قابل اعتماد پارٽنر قرار ڏنو. هن چيو ته انشورنس ٽرانسفارميشن پروگرام جو مقصد پاڪستان جي مالياتي شعبي کي مضبوط ڪرڻ ۽ ان ۾ جامع سڌارا متعارف ڪرائڻ آهي. هن چيو ته هي پروگرام انشورنس جي شعبي جي ترقي لاءِ Udaan Pakistan ۽ سيڪيورٽيز اينڊ ايڪسچينج ڪميشن آف پاڪستان (SECP) جي پنجن سالن جي روڊ ميپ جي مدد ڪندو. محمد حمير ڪريم وڌيڪ چيو ته پروگرام مڪمل طور تي قومي مالياتي شموليت واري حڪمت عملي ۽ قومي موسمياتي تبديلي جي پاليسي جي مقصدن سان مطابقت رکي ٿو، جنهن سان مالياتي نظام کي بهتر بنائڻ ۽ پائيدار ترقي جا مقصد حاصل ڪرڻ ۾ مدد ملندي. اي ڊي بي جي ڊپٽي ڪنٽري ڊائريڪٽر حسين حيدر چيو ته هي هڪ اهم ۽ انقلابي پروگرام آهي جنهن جو مقصد انشورنس شعبي ۾ نون ڪمپنين جي داخلا کي آسان بڻائڻ ۽ صنعت ۾ منصفاڻي مقابلي کي فروغ ڏيڻ آهي. هن چيو ته پروگرام تحت سرڪاري اثاثن جي انشورنس ۾ خانگي انشورنس ڪمپنين جي شموليت کي به وڌايو ويندو. حسين حيدر چيو ته هي پروگرام انشورنس سيڪٽر جي ريگيوليٽري سسٽم کي وڌيڪ مضبوط ڪندو جڏهن ته صارفين جي تحفظ جي قدمن کي به موثر بڻايو ويندو جنهن سان شعبي جي مجموعي ڪارڪردگي ۽ عوام جي اعتماد ۾ اضافو ٿيندو.
Source link
Leave a Comment Leave a Comment
