مصر ۽ قطر آمريڪا ۽ ايران وچ ۾ جاري ڳالهين واري عمل جي حمايت ڪندي ان ڳالهه تي زور ڏنو آهي ته خطي ۾ ڇڪتاڻ گهٽائڻ ۽ امن ۽ استحڪام کي هٿي وٺرائڻ لاءِ ٻنهي ملڪن وچ ۾ طئي ٿيل مفاهمت جي ياداشت تي مڪمل عمل ڪيو وڃي.
مصري پرڏيهي وزارت پاران جاري ڪيل بيان موجب اهو معاهدو مصر جي پرڏيهي وزير ڊاڪٽر بدر عبدالعطي ۽ قطر جي وزيراعظم ۽ پرڏيهي وزير شيخ محمد بن عبدالرحمان الثاني وچ ۾ ٽيليفون تي ڳالهه ٻولهه دوران ٿيو.
بيان ۾ چيو ويو آهي ته ٻنهي اڳواڻن وچ اوڀر جي تازي صورتحال تي تفصيلي ڳالهه ٻولهه ڪئي ۽ ان ڳالهه تي زور ڏنو ته آمريڪا ۽ ايران وچ ۾ جاري ڳالهين کي ڪامياب بڻائڻ لاءِ معاهدي جي شرطن تي عملدرآمد ضروري آهي.
مصر ۽ قطر خطي ۾ امن، استحڪام ۽ سلامتي لاءِ سفارتي ڪوششن کي هٿي وٺرائڻ تي به اتفاق ڪيو ۽ چيو ته سموريون ڌريون اهڙين عملن کان پاسو ڪن جن سان ڇڪتاڻ ۾ اضافو ٿئي.
ٻنهي ملڪن ان اميد جو اظهار ڪيو ته ڳالهين جو عمل مثبت انداز ۾ اڳتي وڌندو جنهن سان نه رڳو آمريڪا ۽ ايران جا لاڳاپا بهتر ٿيندا پر پوري وچ اوڀر ۾ امن ۽ استحڪام جا امڪان به روشن ٿيندا.
