پاڪستان گوادر ۽ ڪراچي جي بندرگاهن ذريعي وچ ايشيائي رياستن کي عالمي مارڪيٽن سان ڳنڍڻ لاءِ متبادل واپاري رستن کي چالو ڪري رهيو آهي، جنهن سان ملڪ جي علائقائي ٽرانزٽ ۽ لاجسٽڪ حب بڻجڻ جي امڪانن کي وڌيڪ وڌايو ويندو.
آذربائيجان جي ميڊيا آرگنائيزيشن دي ڪيسپين پوسٽ جي رپورٽ موجب ازبڪستان پاڪستان تائين پهچ لاءِ افغانستان کان پاسو ڪري نوان واپاري راهداريون استعمال ڪرڻ شروع ڪري ڇڏيون آهن.
رپورٽ ۾ چيو ويو آهي ته تاشقند پاڪ ايران سرحد تي گبود رمدان ذريعي زرعي مشينري ۽ صنعتي خام مال جي ترسيل پڻ شروع ڪري ڇڏي آهي.
رپورٽ ۾ دعويٰ ڪئي وئي آهي ته نئين واپاري راهداري، اپريل 2026 ۾ چالو ٿي، وچ ايشيائي ملڪن کي پاڪستاني بندرگاهن ۽ عالمي مارڪيٽن تائين اضافي ۽ متبادل پهچ فراهم ڪئي آهي، جنهن سان علائقائي واپار کي هٿي وٺرائڻ ۾ مدد ملندي.
دي ڪيسپين پوسٽ موجب آڪٽوبر 2025 ۾ سيڪيورٽي خدشن سبب طورخم ۽ چمن بارڊر ڪراسنگ بند ٿيڻ کانپوءِ پاڪستان متبادل واپاري رستا متعارف ڪرايا جن ذريعي هن وقت تائين 14 هزار ميٽرڪ ٽن کان وڌيڪ سامان منتقل ڪيو ويو آهي.
رپورٽ ۾ چيو ويو آهي ته اهي انگ اکر وڌندڙ اعتماد ۽ نئين لوجسٽڪ نيٽ ورڪ جي طلب کي ظاهر ڪن ٿا.
اقتصادي ماهرن چيو ته نئون ٽرانسپورٽ نيٽ ورڪ ٽي آءِ آر سسٽم ۽ سنگل ونڊو ڪسٽم پليٽ فارم جي استعمال کي فروغ ڏيندو، جڏهن ته سي پيڪ فيز II تحت علائقائي واپار ۾ گوادر بندرگاهه جو ڪردار وڌيڪ مضبوط ٿيندو.
ماهرن جو چوڻ آهي ته جيڪڏهن هي ٽريڊ ڪوريڊور مڪمل طور تي فعال ٿي ويو ته پاڪستان وچ ايشيائي رياستن مان ٽرانزٽ ۽ لاجسٽڪ سروسز جي مد ۾ هر سال 3 بلين ڊالر ڪمائڻ جي صلاحيت رکي ٿو.
