گڏيل قومن جو سربراهه Antonio Guerres 2009 کان پوءِ شام جي پنهنجي پهرين سرڪاري دوري تي پهتو، جتي هو دمشق ۾ اعليٰ قيادت سان اهم ملاقاتون ڪندو.
ميڊيا رپورٽن موجب گڏيل قومن جو سيڪريٽري جنرل انتونيو گوتريس ڇنڇر تي شام پهچي ويو، 2009 کانپوءِ ملڪ جو دورو ڪندڙ پهريون گڏيل قومن جو سربراهه بڻجي ويو.
شام ۾ سياسي تبديلين ۽ نئين حڪومت جي قيام کانپوءِ هن دوري کي عالمي سطح تي هڪ اهم سفارتي پيش رفت قرار ڏنو پيو وڃي.
گوتريس ۽ سندس وفد جو شام جي پرڏيهي وزير اسد الشيباني دمشق انٽرنيشنل ايئرپورٽ تي استقبال ڪيو. دوري دوران گڏيل قومن جو سربراهه صدر احمد الشريع اعليٰ حڪومتي عملدارن ۽ سول سوسائٽي جي نمائندن سان ملاقاتون ڪندو، جنهن ۾ شام جي سياسي صورتحال، انساني بحران، بحالي ۽ گڏيل قومن جي تعاون تي خيالن جي ڏي وٺ جو امڪان آهي.
گڏيل قومن موجب، گوتريس پنهنجي دوري دوران ان ڳالهه تي زور ڏيندو ته شام کي سالن جي گهرو ويڙهه کانپوءِ امن، استحڪام ۽ جامع سياسي عمل ڏانهن وڌڻ لاءِ عالمي تعاون جي ضرورت آهي. هو گولان هائٽس ۾ گڏيل قومن جي امن مشن جو به دورو ڪندو.
اهو دورو ان ڪري به غيرمعمولي اهميت جو حامل آهي ڇو ته 2009ع کان وٺي اڄ تائين ڪنهن به گڏيل قومن جي سيڪريٽري جنرل شام جو سرڪاري دورو نه ڪيو آهي، ان عرصي دوران شام کي هڪ ڊگهي گهرو ويڙهه، وڏي پئماني تي انساني بحران ۽ سفارتي اڪيلائي کي منهن ڏيڻو پيو، جڏهن ته دمشق تازو سياسي تبديلين کانپوءِ عالمي برادري سان لاڳاپا بحال ڪرڻ جي ڪوشش ڪري رهيو آهي.
