شهباز شريف جي صدارت هيٺ توانائي جي سلامتي بابت اهم اجلاس ٿيو، جنهن ۾ ملڪ جي توانائي جي ضرورت، بچت ۽ مستقبل جي حڪمت عملي تي تفصيلي غور ويچار ڪيو ويو.
وزيراعظم چيو ته انرجي سڪيورٽي هاڻي قومي منصوبابندي جو اهم حصو بڻجي چڪي آهي ۽ موجوده علائقائي صورتحال جي باوجود بروقت قدمن جي ڪري ملڪ کي توانائي جي بحران کي منهن ڏيڻو نه پيو.
هن هدايت ڪئي ته مستقبل جي ضرورتن کي نظر ۾ رکندي خام تيل جي اسٽريٽجڪ ذخيرن جي قيام تي ڪم تيز ڪيو وڃي.
اجلاس ۾ توانائيءَ جي بچت ۽ پائيدار ترقيءَ لاءِ ماحول دوست بجليءَ جي نقل و حمل کي هٿي وٺرائڻ تي زور ڏنو ويو.
وزيراعظم هدايت ڪئي ته مستقبل ۾ سرڪاري استعمال لاءِ صرف اليڪٽرڪ بسون ۽ موٽرسائيڪلون خريد ڪيون وڃن ۽ اي وي چارجنگ اسٽيشنز جي قيام جي رفتار تيز ڪئي وڃي.
ان کان علاوه بيٽري اسٽوريج کي آسان بڻائڻ ۽ سولر انرجي مان پيدا ٿيندڙ اضافي بجلي کي محفوظ ڪرڻ لاءِ معياري بيٽرين جي مقامي پيداوار جي حوصلا افزائي ڪرڻ جي هدايت ڪئي وئي.
اجلاس ۾ بريفنگ دوران ٻڌايو ويو ته نيشنل ڪوآرڊينيشن اينڊ مئنيجمينٽ ڪائونسل (اين سي ايم سي) روزاني جي بنياد تي توانائي جي صورتحال جو جائزو وٺي رهي آهي، جڏهن ته ملڪ ۾ هن وقت پيٽروليم شين جا وسيع ذخيرا موجود آهن ۽ گئس ۽ تيل جي مقامي پيداوار ۾ به اضافو ٿي رهيو آهي.
گرڊ سطح جي بيٽري اسٽوريج لاءِ ٻه پائلٽ پروجيڪٽ جاري آهن، جڏهن ته گهريلو شمسي استعمال ڪندڙن کي به بيٽري اسٽوريج اختيار ڪرڻ جي ترغيب ڏني پئي وڃي.
اجلاس ۾ وفاقي وزيرن ۽ اعليٰ عملدارن شرڪت ڪئي ۽ توانائي جي شعبي ۾ جاري قدمن ۽ مستقبل جي حڪمت عملي تي خيالن جي ڏي وٺ ڪئي.
