اسلام آباد:
وزيراعظم جي سبسڊي واري اليڪٽرڪ موٽرسائيڪل اسڪيم کي ڪمرشل بئنڪن کان ڪافي سهڪار نه ملڻ بعد حڪومت پاليسي ۾ وڏي تبديلي جي منظوري ڏئي ڇڏي.
تفصيل موجب بئنڪن وصول ڪيل درخواستن مان صرف 4 هزار 75 يعني لڳ ڀڳ 9 سيڪڙو درخواستن جي منظوري ڏني، جنهن سبب حڪومت هلندڙ مالي سال ۾ 116 هزار اليڪٽرڪ موٽرسائيڪلن جي ورڇ جو هدف حاصل ڪرڻ ۾ ناڪام ٿيندي نظر اچي رهي آهي.
اقتصادي رابطا ڪميٽي پاڪستان ايڪسيلريٽڊ وهيڪل اليڪٽرڪيشن پروگرام ۾ وڏين ترميمن جي منظوري ڏئي ڇڏي آهي، ان پروگرام جو مقصد اليڪٽرڪ سائيڪلن، رڪشا ۽ لوڊرز جي استعمال کي فروغ ڏيڻ آهي، جنهن لاءِ سبسڊي ڏني پئي وڃي.
انگن اکرن موجب هن وقت تائين رڳو 5,409 اليڪٽرڪ سائيڪلون ۽ رڪشا ورهايا ويا آهن، جيڪو سالياني ٽارگيٽ جو فقط 4.5 سيڪڙو آهي. بئنڪن ڏانهن موڪليل 44,689 درخواستن مان صرف 22 سيڪڙو تي عمل ڪيو ويو، جڏهن ته منظوري جي شرح انتهائي گهٽ رهي.
ٻئي طرف، سيلف فنانس اسڪيم تحت بهتر نتيجا ڏسڻ ۾ آيا، جتي تقريبن سمورن درخواست ڪندڙن کي سائيڪلون فراهم ڪيون ويون ۽ اڪثريت کي سبسڊي پڻ ملي.
حڪومت فيصلو ڪيو آهي ته ٻئي مرحلي ۾ سيلف فنانس اسڪيم کي بينڪن جي حيثيت سان ڪم ڪندي اڳتي وڌايو ويندو. نئين سهولت تحت گراهڪ موٽرسائيڪل جي قيمت مان سبسڊي ڪٽيندي ادا ڪري سگهندا، جنهن جي ڪري کين پوري رقم اڳواٽ ادا نه ڪرڻي پوندي.
سرڪاري ملازمن (گريڊ 16 ۽ ان کان هيٺ) لاءِ هڪ خاص اسڪيم پڻ متعارف ڪرائي وئي، جنهن تحت اهي صرف 10 هزار رپيا اڳواٽ ادا ڪري اليڪٽرڪ موٽرسائيڪل حاصل ڪري سگهندا، جڏهن ته باقي ادائگي حڪومت قسطن ۾ ڪندي.
ان کان علاوه حڪومت شاگردن لاءِ هڪ اسڪيم جو به اعلان ڪيو آهي، جنهن تحت سڄي ملڪ جي تعليمي بورڊن جي ممتاز پوزيشن هولڊرن کي 600 برقي سائيڪلون ورهايون وينديون.
اختيارين موجب نئين اسڪيم تحت ٽن مهينن ۾ هڪ لک اليڪٽرڪ موٽرسائيڪلون متعارف ڪرائڻ جو به منصوبو جوڙيو ويو آهي، جنهن سان تيل جي بچت ٿيندي ۽ پرڏيهي مٽاسٽا ۾ گهٽتائي ٿيندي.
