وزيراعظم جو چين جو دورو؛ ايم او يوز تي صحيحون، سي پيڪ سميت ٻين شعبن ۾ تعاون جي فروغ تي ڳالهيون

وزيراعظم شهباز شريف جي چين جي دوري دوران صوبي زي جيانگ ۾ مفاهمتي يادداشتن تي صحيحون ڪيون ويون ۽ صوبائي قيادت سان ملاقات دوران صوبائي سطح تي سهڪار، پاڪ چين اقتصادي لنگهه (سي پيڪ) جي ٻئي مرحلي ۾ سهڪار وڌائڻ ۽ ٻين شعبن تي خيالن جي ڏي وٺ ڪئي وئي. وزيراعظم آفيس پاران جاري ڪيل بيان ۾ چيو ويو آهي ته وزيراعظم شهباز شريف چين جي شهر بانگرو ۾ بزنس فورم ۾ شرڪت ڪئي، جتي ڪميونسٽ پارٽي آف چائنا جي جيانگ صوبائي ڪميٽي جي پارٽي سيڪريٽري وانگ هائو سندس آجيان ڪئي. ان موقعي تي وزيراعظم چيو ته صوبائي سطح تي تعاون پاڪستان ۽ چين لاڳاپن جو هڪ اهم ستون آهي، جيڪو صنعتي تعاون، زرعي جديديت، ٽيڪنالاجي جي مٽاسٽا ۽ برآمداتي ترقي ذريعي سي پيڪ فيز 2 کي اڳتي وڌائڻ ۾ اهم ڪردار ادا ڪري سگهي ٿو. وزيراعظم شي جيانگ صوبي جي شاندار ترقياتي منصوبابندي ۾ صدر شي جن پنگ جي دور اندیش قيادت جي واکاڻ ڪئي، جيڪا هن جي جيانگ صوبائي ڪميٽي جي پارٽي سيڪريٽري جي حيثيت سان ڪئي. شهباز شريف چيو ته جيانگ جي ترقي ان ڳالهه جو عملي مثال آهي ته ڪيئن ماحولياتي تحفظ، سرسبز ترقي ۽ اعليٰ معيار جي معاشي ترقي کي گڏ ڪري سگهجي ٿو. هن چيو ته پاڪستان جيانگ صوبي سان خاص طور تي ڊجيٽل معيشت، اي ڪامرس، انفارميشن ٽيڪنالاجي، ٽيلي ڪميونيڪيشن، زراعت، قابل تجديد توانائي، جديد صنعتڪاري ۽ مهارت جي ترقي جي شعبن ۾ تعاون کي وڏي اهميت ڏئي ٿو. ان دوران وزيراعظم تعاون بابت ٻن اهم دستاويزن تي صحيحن واري تقريب ۾ پڻ شرڪت ڪئي، پهرين مفاهمتي ياداشت چين جي صوبي ۽ پنجاب جي وچ ۾ ڀيڻ-صوبائي لاڳاپن جي قيام سان لاڳاپيل هئي، جنهن جو مقصد واپار، سيڙپڪاري، زراعت، تعليم، ثقافت، سياحت ۽ عوامي رابطن جي شعبن ۾ تعاون کي فروغ ڏيڻ آهي. وزيراعظم هانگزو نارمل يونيورسٽي ۽ بيجنگ ۾ پاڪستاني سفارتخاني وچ ۾ چائنا-پاڪستان جوائنٽ ٽيڪنالاجي ريسرچ سينٽر جي قيام بابت دستاويز تي صحيحن جي تقريب ۾ پڻ شرڪت ڪئي جنهن سان ٻنهي ملڪن جي ادارن جي وچ ۾ علمي تعاون، عملي تحقيق، ٽيڪنالاجي جي مٽاسٽا ۽ رابطن کي هٿي ملندي. وزيراعظم چيو ته پاڪستان ۽ چين سفارتي لاڳاپن جي قيام جي 75هين سالگرهه ملهائي رهيا آهن ۽ ٻئي ملڪ عوام دوست، ترقي پسند ۽ عملي تعاون جي نئين دور ۾ داخل ٿي رهيا آهن. ان کان اڳ وزيراعظم شهباز شريف چين جي 4 ڏينهن جي دوري جي پهرين مرحلي ۾ هنگزو پهتو، جتي زي جيانگ صوبي جي وائيس گورنر زو وينگ وانگ، پاڪستان ۾ چين جي سفير جيانگ زيڊونگ ۽ بيجنگ ۾ پاڪستاني سفير خليل هاشمي زياوشين ايئرپورٽ تي سندس استقبال ڪيو. ان دوري ۾ وزيراعظم چين جي معروف ڪمپنين جي سربراهن سان به ملاقات ڪندو ۽ چيني ڪمپني علي بابا جي هيڊ ڪوارٽر جو دورو پڻ ڪندو. وزيراعظم پنهنجي دوري جي ٻئي مرحلي ۾ بيجنگ روانو ٿيندو، جتي هو صدر شي جن پنگ ۽ وزيراعظم لي چيانگ سان ملاقاتون ڪندو ۽ سياسي، اقتصادي ۽ اسٽريٽجڪ شعبن ۾ ٻه طرفي سهڪار جو جائزو وٺندو. بيان ۾ چيو ويو آهي ته وزيراعظم جي چيني قيادت سان ملاقاتن ۾ سي پيڪ، واپار، سيڙپڪاري، صنعتي تعاون، زرعي جديديت، انفارميشن ٽيڪنالاجي، سائنس ۽ ٽيڪنالاجي ۽ عوامي رابطن تي خاص ڌيان ڏنو ويندو.



Source link