مري ۾ عيد جي موڪلن دوران روزانو 70 هزار گاڏين جي آمد کي نظر ۾ رکندي سيڪيورٽي ۽ ٻيا انتظام سخت ڪيا ويا آهن.
ڊي پي او مري ڊاڪٽر رضا تنوير سپرا چيو آهي ته عيد جي موڪلن ۽ لانگ ويڪينڊ دوران روزانو 60 کان 70 هزار گاڏيون مري ۾ اچڻ جو امڪان آهي، جنهن کي نظر ۾ رکندي خاص ٽريفڪ ۽ سيڪيورٽي پلان تي عمل ڪيو ويو آهي.
هن چيو ته گهوڙا گلي، باريان، چانڊيا ۽ ديوال تي اهم چيڪ پوسٽون چالو ڪيون ويون آهن، جڏهن ته ڦلگران ٽول پلازه ۽ 17 ميلن تي اضافي پوليس ۽ ٽريفڪ اهلڪارن کي مقرر ڪيو ويو آهي. ان کان علاوه ڀريا ڪهو بائي پاس انٽري ۽ ايگزٽ پوائنٽس تي خاص چيڪنگ ۽ مانيٽرنگ ڪئي پئي وڃي.
ڊاڪٽر رضا تنوير سپرا جو چوڻ هو ته جهيڪا گلي، لوئر ٽوپا ۽ بنسارا گلي ۾ ٽريفڪ جا ضابطا وڌيڪ سخت ڪيا ويا آهن، جڏهن ته ڪلڊانا ۽ لارنس ڪاليج روڊ ٽي چوڪ تي خاص ناڪابندي ڪئي وئي آهي. هن چيو ته مري پوليس لانگ ويڪ اينڊ دوران سياحن جي سهولت ۽ سيڪيورٽي جا مڪمل انتظام ڪيا آهن.
هن وڌيڪ ٻڌايو ته مصري ۽ مال روڊ جي پي او چوڪ بيلٽ ۾ اضافي نفری ۽ گشت جاري آهي، جڏهن ته سمورن داخل ۽ خارجي رستن تي سرچ، چيڪنگ ۽ مانيٽرنگ سخت ڪئي وئي آهي. ڊي پي او مري شهرين کي هدايت ڪئي ته اهي پنهنجا سڃاڻپ ڪارڊ پاڻ وٽ رکن.
انتظاميا موجب فيملي ۽ سياحن جي سهولت لاءِ ٽريفڪ ۽ ضلعي پوليس هر وقت موجود آهي، جڏهن ته اهم سياحتي هنڌن تي ڊولفن، ايليٽ ۽ ضلعي پوليس گڏيل ڊيوٽي سرانجام ڏئي رهي آهي. شهري ۽ سياح ٽريفڪ پوليس جي هدايتن تي عمل ڪن ته جيئن ٽريفڪ جي روانگي برقرار رهي.
ڊاڪٽر رضا تنوير سپرا وڌيڪ چيو ته لانگ ويڪ اينڊ دوران ڪنهن به ايمرجنسي کي منهن ڏيڻ لاءِ خاص ٽيمون تيار رکيون ويون آهن جڏهن ته مري پوليس امن امان ۽ خانداني ماحول کي يقيني بڻائڻ لاءِ سرگرم آهي.
