اسلام آباد:
پاڪستان انٽرنيشنل مانيٽري فنڊ (آءِ ايم ايف) کي يقين ڏياريو آهي ته خودمختار دولت فنڊ (ايس ڊبليو ايف) جي رياستي ادارن جي سڌي ريت وڪڻڻ، قرض وٺڻ ۽ آمدني برقرار رکڻ جا اختيار واپس ورتا ويندا.
ذريعن موجب ناڻي واري وزارت هڪ ڀيرو ٻيهر ڊيڊ لائن ۾ ترميمن کي پارليامينٽ ۾ پيش ڪرڻ ۾ ناڪام ٿي وئي آهي، جنهن تي آءِ ايم ايف سخت شرط لاڳو ڪري ڇڏي آهي ته قانون ۾ وڏي تبديلي کانسواءِ فنڊ فعال نه ٿو ٿي سگهي.
نئين تجويز ڪيل ترميمن تحت، فنڊ هڪ هولڊنگ ڪمپني تائين محدود هوندو، جيڪا صرف سرڪاري شعبي جي ادارن کي منظم ڪندي ۽ انهن جي ڪارڪردگي بهتر ڪرڻ تي ڌيان ڏيندو.
معاهدي موجب، خودمختار دولت فنڊ ڪنهن به رياستي اثاثن کي سڌو سنئون وڪرو نه ڪري سگهندو، پر نجڪاري جو عمل عالمي معيارن موجب شفاف ۽ مقابلي واري طريقي سان ڪيو ويندو.
ان کان علاوه، فنڊ پنهنجي آمدني حڪومت ڏانهن منتقل ڪندو ۽ قرض وٺڻ يا ڪنهن به مالي ضمانت ڏيڻ جي اجازت نه هوندي.
حڪومت اهو به يقين ڏياريو آهي ته فنڊ جي بورڊ ۽ ايڊوائزري ڪميٽي کي ميرٽ ۽ شفاف طريقي سان مقرر ڪيو ويندو ته جيئن ان جي خودمختياري برقرار رهي.
ٻئي طرف نجڪاري واري شعبي ۾ اڃا به سستي آهي، جتي پاڪستان انٽرنيشنل ايئر لائنز (پي آءِ اي) جي نجڪاري کانسواءِ ڪا خاص اڳڀرائي نه ٿي آهي، جڏهن ته ڪجهه بجلي جي ڊسٽريبيوشن ڪمپنين ۾ نجي شعبي جي شموليت به دير ڪري رهي آهي.
