تهران:
ايران ۽ آمريڪا وچ ۾ مفاهمت جي ياداشت تي صحيحن کانپوءِ ايراني پرڏيهي وزارت جي ترجمان اسماعيل بقائي معاهدي جي تفصيل ۽ مستقبل جي سفارتي عمل بابت اهم وضاحتون جاري ڪيون آهن.
سرڪاري ٽي وي سان ڳالهائيندي ايراني پرڏيهي وزارت جي ترجمان تصديق ڪئي ته ٻنهي ملڪن جي صدرن معاهدي جي متن تي صحيحون ڪيون آهن، جنهن کانپوءِ ڪيترائي اهم سفارتي قدم بحال ڪيا ويا آهن.
ترجمان موجب سوئٽزرلينڊ ۾ جمعي تي رٿيل ملاقات اصل ۾ معاهدي تي صحيحن جي تقريب لاءِ نه هئي پر هاڻي صورتحال تبديل ٿي وئي آهي، اجلاس جي انعقاد يا منسوخي بابت فيصلو ايندڙ ڪجهه ڪلاڪن ۾ متوقع آهي.
هن چيو ته جنيوا ۾ ڳالهين جي ٽيمن جي شرڪت اڳ کان ترتيب ڏنل شيڊول موجب جاري رهندي.
ايراني ترجمان اسماعيل بقائي موجب مفاهمتي ياداشت تي عملدرآمد لاءِ فوري سطح تي ٽيڪنيڪل ڳالهيون شروع ڪيون وينديون، جڏهن ته آبنائے هرمز جا معاملا ايران ۽ عمان جي گڏيل ذميواري هيٺ ڏٺا ويندا.
هن واضح ڪيو ته جيڪڏهن خطي ۾ ڇڪتاڻ جاري رهي، خاص طور تي لبنان تي حملا جاري رهيا ته ان کي معاهدي جي خلاف ورزي تصور ڪيو ويندو.
ايراني پرڏيهي وزارت موجب آبنائے هرمز ۾ جهازن ۽ خدمتن جي فراهمي جي بدلي ۾ فيس ورتي ويندي، جڏهن ته ايران وٽ افزوده يورينيم جي سطح گهٽائڻ جو اختيار آهي.
ترجمان وڌيڪ چيو ته ايران جي ميزائل پروگرام تي ڪا به ڳالهه ٻولهه ممڪن ناهي ۽ نه ئي ايراني ايٽمي مواد ملڪ کان ٻاهر منتقل ڪيو ويندو.
بيان ۾ اهو به چيو ويو آهي ته 60 ڏينهن اندر ٻئي ڌر کي خطي ۾ فوجي موجودگي وڌائڻ يا نيون پابنديون لاڳو ڪرڻ کان پاسو ڪرڻ گهرجي.
ايران موجب، ساڳئي عرصي اندر تيل تي پابندي ختم ڪئي وڃي ۽ ايران کي پنهنجي تيل جي برآمدات کي مڪمل طور تي بحال ڪرڻ جي اجازت ڏني وڃي.
اسماعيل بقائي ان ڳالهه تي زور ڏنو ته آمريڪا کي ايران جي منجمد اثاثن تائين پهچ ۾ رڪاوٽون هٽائڻ گهرجن، جڏهن ته تهران ايران جي دفاعي صلاحيتن ۽ ميزائل پروگرام تي ڪنهن به ٻاهرين دٻاءَ يا بحث کي مڪمل طور رد ڪري ٿو.
ايراني پرڏيهي وزارت موجب جيتوڻيڪ موجوده معاهدو هڪ نئين سفارتي پيش رفت آهي پر ان تي عملدرآمد خطي ۾ اعتماد سازي ۽ گڏيل احترام سان مشروط هوندو.
