تهران: ايران آمريڪا تي الزام لڳايو آهي ته جڏهن به عالمي توانائي جي قيمتن ۾ اضافو ٿيندو آهي ته ٻيهر ڳالهين جي ڪوشش ڪئي ويندي آهي.
تهران ۾ صحافين سان ڳالهائيندي ايراني پرڏيهي وزارت جي ترجمان اسماعيل بقائي چيو ته ايران خلاف جنگ جي شروعات ۾ آمريڪا اهو سمجهيو هو ته ايران ڪجهه ڏينهن ۾ ڪمزور ٿيندو ۽ هٿيار ڦٽا ڪري ڇڏيندو پر صورتحال ان جي اميدن جي ابتڙ هئي.
اسماعيل بقائي موجب، آمريڪا جو شروعاتي اندازو هو ته ايران ٽن ڏينهن اندر تباهه ۽ هٿيار ڦٽا ڪري ڇڏيندو، پر ڪيترائي مهينا گذرڻ باوجود ائين نه ٿيو.
هن چيو ته ايران آمريڪا کي جنگ جي خاتمي جو تعين ڪرڻ نه ڏيندو ۽ ايران آمريڪا کي ڳالهين جي بحالي جي ڪا به درخواست ناهي ڪئي ڇو ته ائين ڪرڻ ايرانين جي فطرت ۾ ناهي.
هن وڌيڪ چيو ته ايران ۽ عمان وچ ۾ آبنائے هرمز جي انتظام جي حوالي سان ڳالهيون هاڪاري رهيون آهن، جڏهن ته آبنائے هرمز جي صورتحال تبديل نه ٿي آهي ۽ بند رهندي.
اسماعيل بقائي چيو ته ايران خلاف آمريڪا جي جنگ ۾ ڪجهه خليجي ملڪ ملوث آهن.
هن آمريڪا ۽ اسرائيل جي گڏيل ڪاررواين کي به تنقيد جو نشانو بڻائيندي چيو ته واشنگٽن اڃا به پنهنجي عمل کي جواز ڏيڻ جي ڪوشش ڪري رهيو آهي جڏهن ته ايران انهن کي جارحيت قرار ڏئي ٿو.
ايراني ترجمان دعويٰ ڪئي ته تهران ڏٺو آهي ته جڏهن به عالمي توانائي مارڪيٽن تي دٻاءُ وڌندو آهي ۽ تيل ۽ گئس جون قيمتون وڌي وينديون آهن ته آمريڪا ٻيهر ڳالهين جو رخ ڪندو آهي.
هن چيو ته ايران پنهنجي قومي پاليسين ۽ مفادن موجب فيصلا ڪندو ۽ پرڏيهي دٻاءَ هيٺ پنهنجو موقف تبديل نه ڪندو.
بقائي ڳالهين بابت وڌيڪ تفصيل فراهم نه ڪيو پر هن چيو ته ايران سفارتي عمل جو مخالف ناهي پر ڳالهيون گڏيل احترام ۽ برابري جي بنياد تي ٿيڻ گهرجن.
بيان هڪ اهڙي وقت ۾ سامهون آيو آهي جڏهن وچ اوڀر ۾ ڇڪتاڻ، آبنائے هرمز جي صورتحال ۽ عالمي توانائي مارڪيٽن ۾ عدم استحڪام هڪ ڀيرو ٻيهر ايران ۽ آمريڪا وچ ۾ سفارتي لاڳاپن تي ڌيان ڇڪايو آهي.
ياد رهي ته گذريل ڪجهه مهينن کان ايران ۽ آمريڪا وچ ۾ مختلف ثالثي ڪندڙ ملڪن ذريعي رابطن ۽ ڳالهين جون خبرون سامهون آيون آهن پر ٻنهي ملڪن وچ ۾ بنيادي اختلاف اڃا به برقرار آهن.
