اينٽي اسمگلنگ آپريشن ۾ 3 ڪروڙ 82 لک رپين کان وڌيڪ جي منشيات هٿ ڪئي وئي.
اي اين ايف جي ترجمان موجب مختلف شهرن ۾ منشيات جي اسمگلنگ خلاف ڪريڪ ڊائون جاري آهي، 7 ڪاررواين دوران 2 عورتن سميت 10 شڪي ماڻهن کي گرفتار ڪري 38.2 ملين رپين کان وڌيڪ ماليت جي 487.31 ڪلوگرام منشيات هٿ ڪئي وئي.
باچا خان ايئرپورٽ تي جده ويندڙ 2 عورتن سميت 3 مسافرن جي بيگ مان 1.960 ڪلوگرام برف هٿ ڪري جوابدارن کي گرفتار ڪيو ويو. ٻئي طرف اسلام آباد ايئرپورٽ تي جده ويندڙ 3 مسافرن جي ڪپڙن ۾ جذب ٿيل 6.55 ڪلو برف هٿ ڪري جوابدارن کي حراست ۾ ورتو ويو آهي.
ان کان علاوه رنگ روڊ پشاور ويجهو ٽرڪ مان 410.4 ڪلو چرس هٿ ڪري جوابدارن کي گرفتار ڪيو ويو. لاهور جي ملتان روڊ تي رڪشا مان 25.2 ڪلو گرام چرس هٿ ڪري جوابدار کي گرفتار ڪيو ويو، جڏهن ته ڪوئيٽا جي اسپني روڊ تي ڪوريئر آفيس جي پارسل ۾ موجود فائبر باڪس مان 19.2 ڪلو چرس هٿ ڪئي وئي.
انڊس هاءِ وي ڄامشورو ويجهو ٽرڪ مان 18 ڪلو چرس هٿ ڪري جوابدار کي گرفتار ڪيو ويو آهي. نيشنل هاءِ وي حيدرآباد ويجهو مسافر جي قبضي مان 6 ڪلو چرس هٿ ڪري کيس حراست ۾ ورتو ويو آهي.
نارڪوٽڪس ڪنٽرول ايڪٽ 1997 تحت ڪيس داخل ڪيو ويو آهي ۽ سمورن سرگرمين جي جاچ شروع ڪئي وئي آهي.
