آمريڪي ڳالهين سان واقف هڪ آفيسر چيو آهي ته ايران هڪ فريم ورڪ معاهدي جي ويجهو وڃي رهيو آهي جيڪو جنگ کي ختم ڪرڻ ۾ مدد ڪري سگهي ٿو.
يو ايس براڊ ڪاسٽنگ ڪارپوريشن جي رپورٽ ۾ دعويٰ ڪئي وئي آهي ته پاڪستان، ترڪي ۽ مصر آمريڪا ۽ ايران وچ ۾ ٻن هفتن جي جنگ بندي ختم ٿيڻ کان اڳ ٻيهر ڳالهيون شروع ڪرڻ جي ڪوشش ڪري رهيا آهن.
ان حوالي سان آمريڪي اختيارين جو چوڻ هو ته سمورين ڌرين سان ڳالهيون جاري آهن ۽ جنگبندي جو معاهدو تمام ويجهو اچي ويو آهي.
”اسان هڪ معاهدو ڪرڻ چاهيون ٿا ۽ ايراني حڪومت ۾ ڪجهه ماڻهو راضي آهن پر اصل چئلينج اعليٰ قيادت کي قائل ڪرڻ آهي ،“ هڪ ٻئي آمريڪي حڪومتي اهلڪار پنهنجو نالو ظاهر نه ڪرڻ جي شرط تي ٻڌايو.
آمريڪي اهلڪار جو وڌيڪ چوڻ آهي ته جيڪڏهن ايراني اختيارين سيز فائر معاهدي تي راضي ٿي ويا ته ان جو سبب انهن بندرگاهن تي آمريڪي پابندي آهي، جنهن سان ايران جي معيشت متاثر ٿي رهي آهي.
آمريڪي عملدارن موجب ايران وٽ پئسو ختم ٿي چڪو آهي ۽ مالي طور تي تمام ڪمزور آهي، ايراني حڪومت کي اها خبر آهي.
هڪ ٻئي آمريڪي اهلڪار جو چوڻ هو ته جيڪڏهن تيل پيدا نه ٿي سگهيو ته ايران جي حالت وينزويلا کان به وڌيڪ خراب ٿي سگهي ٿي.
آمريڪي ميڊيا رپورٽن موجب جيڪڏهن فريم ورڪ معاهدو ٿي ويو ته جنگ بندي کي وڌايو ويندو ته جيئن وڌيڪ ڳالهين جي اجازت ڏني وڃي.
جڏهن ته آمريڪي اختيارين جو چوڻ آهي ته جنگ بندي جي توسيع تي اڃا تائين ڪو باضابطه معاهدو ناهي ٿيو. هن وقت ٻنهي ملڪن وچ ۾ رابطا ۽ ڳالهيون جاري آهن.
