روسي صدر ولاديمير پيوٽن پنهنجي آمريڪي هم منصب ڊونلڊ ٽرمپ سان فون تي ڳالهه ٻولهه ڪئي ۽ وچ اوڀر ۾ جنگ ۽ يوڪرين جي تڪرار تي خيالن جي ڏي وٺ ڪئي.
ميڊيا رپورٽن موجب ڪريملن جي ترجمان يوري يوشاڪوف هڪ پريس ڪانفرنس کي ٻڌايو ته ڪال 90 منٽن کان وڌيڪ هلي ۽ اها صاف ۽ ڪاروباري هئي.
يوشاڪوف چيو ته ٻنهي صدرن ايران ۽ خليج فارس جي صورتحال تي خاص ڌيان ڏنو. ولاديمير پيوٽن ڊونلڊ ٽرمپ جي ايران سان جنگبندي ۾ واڌ جي فيصلي کي درست سمجهي ٿو، ڇاڪاڻ ته ان سان ڳالهين کي هڪ ٻيو موقعو ملندو ۽ مجموعي صورتحال کي مستحڪم ڪرڻ ۾ مدد ملندي.
يوشاڪوف جو چوڻ هو ته پوتن نه رڳو ايران ۽ ان جي پاڙيسري ملڪن لاءِ پر پوري عالمي برادري لاءِ انتهائي نقصانڪار نتيجا اجاگر ڪيا، جيڪڏهن آمريڪا ۽ اسرائيل ٻيهر فوجي ڪارروائي ڪن ٿا.
ٽرمپ سان ٽيليفون تي ڳالهه ٻولهه ۾ پيوٽن وڌيڪ چيو ته روس وچ اوڀر جي تڪرار تي سفارتي ڪوششن جي هر ممڪن مدد ڪرڻ لاءِ پرعزم آهي.
