بنون پوليس دهشتگردن خلاف ڪاررواين ۾ وڏي ڪاميابي حاصل ڪري 24 ڪلاڪن دوران 5 خطرناڪ دهشتگردن کي ماري ڇڏيو. خيبرپختونخواهه پوليس موجب چوڪي فتح خيل واقعي کانپوءِ آءِ جي خيبرپختونخواهه ذوالفقار حميد ۽ ڊي آءِ جي بنون سجاد خان جي خاص هدايتن تي انٽيليجنس بيسڊ آپريشن شروع ڪيو ويو. آپريشنز جي حوالي سان ٻڌايو ويو ته ڪامياب آپريشن ۾ چوڪي فتح خيل واقعي جو ماسٽر مائينڊ زرولي جو ڀائٽيو حيات الله مارجي ويو، جيڪو دستي بم ٺاهڻ جو ماهر هو ۽ چوڪي کي تباهه ڪرڻ لاءِ رڪشا ۾ بم نصب ڪيو هو. پوليس جو چوڻ آهي ته مارجي ويل دهشتگردن وٽان آءِ اي ڊي ٺاهڻ وارو سامان، بال بيرنگ، پرائما ڪارڊ ۽ بارود پڻ هٿ ڪيو ويو آهي. مارجي ويل دهشتگرد حيات الله پڻ بدنام ٽارگيٽ ڪلر هو ۽ ڪيترن ئي سنگين واقعن ۾ گهربل اشتهاري هو. اهڙي طرح ڪاررواين ۾ چيڪ پوسٽ تي حملي ۾ ملوث خيري اسد يار ۽ خيري نعمت الله پڻ مارجي ويا آهن ۽ موثر حڪمت عملي تحت مارجي ويل دهشتگردن ۾ اهم دهشتگرد ڪمانڊر منصور به شامل آهي. وڌيڪ ٻڌايو ويو ته مارجي ويل دهشتگرد سڪيورٽي فورسز، سي ٽي ڊي ۽ پوليس اهلڪارن سميت معصوم شهرين تي حملن ۾ گهربل هئا. ريجنل پوليس آفيسر بنون سجاد خان چيو ته شهيدن جي رت جي هڪ هڪ قطري جو حساب ورتو ويندو، بنون جا غيرتمند فرزند پنهنجي سرزمين جو دفاع ڪرڻ ڄاڻن ٿا، ضلعي ۾ مڪمل امن قائم ٿيڻ تائين دهشتگردن خلاف ڪارروايون جاري رهنديون. هن چيو ته آءِ جي خيبرپختونخواهه ذوالفقار حميد بنون پوليس جي خاص تعريف ڪئي آهي ۽ نقد انعام جو به اعلان ڪيو آهي. آءِ جي خيبرپختونخواهه ذوالفقار حميد چيو آهي ته بنون پوليس بهادري جي نئين تاريخ رقم ڪئي آهي، هو دهشتگردن جو نيٽ ورڪ ٽوڙي صوبي مان امن جي دشمنن ۽ انهن جي سهولتڪارن جو خاتمو آڻيندا.
Source link
Leave a Comment Leave a Comment
