اسرائيلي ميڊيا دعويٰ ڪئي آهي ته غزه شهر ۾ ڊرون حملي دوران فلسطيني مزاحمتي تنظيم حماس جي ترجمان حازم قاسم کي نشانو بڻائڻ جي ڪوشش ڪئي وئي پر هو حملي ۾ محفوظ رهيو جڏهن ته زخمي ٿيڻ جا اطلاع آهن.
رپورٽن مطابق اسرائيلي فوج غزه شهر ۾ هڪ گاڏي کي ڊرون حملي سان نشانو بڻايو. حملي جي نتيجي ۾ حازم قاسم زخمي ٿي پيو، جڏهن ته سندس هڪ ساٿي مارجي ويو.
اسرائيلي ميڊيا جو چوڻ آهي ته آپريشن جو مقصد حازم قاسم کي نشانو بڻائڻ هو پر حملو پنهنجو هدف حاصل ڪرڻ ۾ ناڪام رهيو ۽ هو بچي ويو.
واقعي بابت اسرائيلي فوج يا حڪومت طرفان ڪوبه باضابطه بيان نه آيو آهي، جڏهن ته حماس فوري طور تي رپورٽن جو جواب ناهي ڏنو.
جيتوڻيڪ آزاد ذريعن واقعي جي تصديق نه ڪئي آهي، تنهنڪري حملي جا مڪمل تفصيل ۽ ان جا نتيجا اڃا تائين واضح نه آهن.
اها پيش رفت هڪ اهڙي وقت ۾ سامهون آئي آهي جڏهن غزه ۾ اسرائيلي ڪاررواين ۽ فلسطيني مزاحمتي تنظيمن وچ ۾ ڇڪتاڻ جاري آهي ۽ خطي ۾ سيڪيورٽي صورتحال انتهائي حساس آهي.
